top of page

Mano Po, Msgr. Noe



Sarong hapon, tiripon kaming mga SC, mga Retirees asin mga taga madia sa Kantong Putikon diyan sa SM tanganing magpa ayahay asin magpasiram siram sa irestoryahan mantang nag kakape asin nag rara’ngot nin donut asin burger. Kaatubang ki si Former City Councilor Joe Grageda, an pinaka inot na taga radyo sa samuyang grupo, ta si Joe Grageda nagpoon magtaram sa DZGE sa lindong ni SM Sonia Leanio kan taon 1962. Si Joe Grageda an kaibahan ni Former Congressman Sal Fortuno na naka pasar sa audition sa DZGE. Si Sal Fortuno pig assigned ni Sonia Leanio sa News Department asin si Joe Grageda napaduman sa pagiging DJ na an programa iyo an request and dedication. Sa tahaw kan samuyang istoryahan, may sarong dakulang lalako, disente, nakaputi na polo, nag bisa asin ini sinimbag man ni Joe nin pagbisa sabay sabi Sakuya na, “iyo ini si Monsignor Noe Badiola”. Tolos ako nagbisa, sabi ko “ Mano Po, Monsignor Noe”, sa dai linalaoman, tolos akong pig akbay ni Monsignor asin sinabi an sakuyang pangaran na dai niya nanggad ako nalilingawan. Si Msgr. Noe naging estudyante ni Joe Grageda durante kan panahon na siya saro pang Professor sa Major Seminary. Mismo nang si Msgr. Noe an nagdeklara ki Joe Grageda, na kaya dai niya nanggad nalilingawan an sakuyang persona ta kaming duwa ni Msgr. Iyo an mag co-host sa sarong radio program sa DZHN-Am sa deck-roof kan Supermarket kkan taon 1981. An simbahan katolika kan panahon na idto, aktibo sa pakipag koordinar sa mga estasyon nin radyo sa katuyuhan na makaduhol nin dagdag kaaraman para sa kultura asin marhay na kaugalian. An programa kan simbahan na pig brodkast sa DZHN ginigibo tuyong aldao nin Domingo sa oras na alas 4 nin hapon, asin igua nin titulo na “Movie Analysis”. An mga sikat na pelikula sa sinehan ni Bichara iyo an pig didiskuter sa radyo tanganing maisihan kan mga tawo an leksyon na naguno sa pelikula. An paglaog sa sinehan iyo an numero unong kaogmahan kan mga taga Naga kaya importante man nanggad na maitukdo kan simbahan an mga leksyon gikan sa pig dadalan na pelikula. Magpoon kaidto nanging ordinaryo samuya ni “Father Noe” an mag istoryahan asin magkumustahan tuyong kami nagkaka sumpungan sa natad kan Seminaryo, sa Centro o maski duman sa Domestic Airport. Kan panahon na idto, si Msgr. Noe, iguang tindog nin marhay na basketbolista asin kaguapohan nin sarong matinee idol sagkod na inabot niya an pagiging Monsignor sa dakulang Metropolitan Cathedral asin ngonian siya an namamayo kan Basilida Menore. Aram kan mga Naguenio na si Msg. Noe gikan sa prominenteng familia Badiola sa Rinconada partikularmente sa banwaan nin Baao. Dakula man an sakuyang orgullo na sinabi ni Msgr. Noe na saro siyang regular na para basa kan sakuyang kolum digdi sa Bicol Mail, an Calle Maduros.

Comentarios


bottom of page