Maogma An Pulitika Kaidto

Ngonian na panahon nin pulitika, aram kong igua satuya ang dai malikayan na magiromdoman an sistema nin pulitika kan kita mga aki pa. Harayo nang marhay kun ikukumpara an pulitika ngonian kesa kaidtong mga inot na panahon. Kan kami yaon pa sa elementarya, an solamenteng partisipasyon mi sa pulitika iyo an mag distribuer nin sample ballot sa tinampo na harani sa escuelahan. Sa mga aki kaidto, ogmahon an magdistribuer nin sample ballots ta libre nin kopya na gibo sa karagomoy na may pangaran kan pulitiko, libre pa an tshirt may kadikit na bayad na sentimo asin libre an kakan sa harong kan pulitiko. Sa panahon nin kampanya, maogmang maglibot na may bitbit nin balde nin tinunaw na gawgaw asin may kapot na brush gamit sa pagpadukot sa mga pader kan retrato kan kandiddato ta dai pa uso kaidto an tarpaulin, kaibahan na diyan an sa pusikit na sistema na an karatula kan kalaban na kandidato pig tatapalan kan karatula kan saindang kandidato kaya iyo idto an pinupunan nin iriwal. May minsan naanggot samuya an kagharong ta tinugutan na daa kaming magpadukot kan poster an maindata ta pig tapalan si poster kan saindang kumpadre na kandidato. Maogma an pulitika kaidto ta wala too an libreng kakanan, huna mo fiesta ta dai nag ontok an mga tawo sa pakikakan maski dai na nag voto sa kandidato. An mga tuso na kandidato, namamakal nin mga tulang nin damulag tanganing gibohon sinabawan na igua nin lubas asin timpla para ipahigop sa mga botante na naghahapit sa saindang headquarters. An mga boto-boto kan damulag kung perang aldao na pig lalaga asin pig kakagran nin betsin tanganing ipahigop sa mga botante. Dai pa uso kaidto an sobre, o an barakalan nin voto, pero nauso na ang grocery items na ipinag dedestribuer sa bisperas kan election. Popular kaidto an tribuna o pag platika sa entablado sa centro kan banwaan o ciudad, dai naghaloy an entablado ikinaag na sa barangay para magplatika. Ngonian na panahon pig uusar na an social media asin an mga radyok kaya dai na uso an mag tribuna sa centro o población, mas uso ngonina iyo an nga jingle o mga kanta na paulit ulit na pig sasambit an pangaran kan kandidato. Alagad saro sana an satuyang masasabi sa pulitika ngonian, haros mayo nang kamugtakan ta an voto nababakal na asin mayo nang pakiaram kun demonyo o anghel an kandidato importante igua siyang perak na pambakal nin voto.