top of page

MAPAASENSO SA AGRIKULTURA, TURISMO: Grupo nin paraoma sa itaas na brgy kan Naga pinapakusog

An man-ibaibang grupo nin paraoma kan upper barangay Carolina, Ciudad nin Naga padagos na pinapakusog bako sanang sa pagpalangkaw nin produksyon alagad mapaasenso an sektor na ini magin sa lado nin turismo.


Sa paagi nin training sa bagong mga teknolohiya sa ‘‘farming’’ magin sa paghanap nin ‘'resources’’ matatabangan sinda bako sanang si may mahiwas na kadagaan envez dawa sa laog kan natad nin sarong familia.


Si Punong Barangay Leoncio Libuit nagpahayag sa entrevista kan Bicol Mail na sainda nang pigponan na organisaron an paratanum nin prutas asin gulayon na nginaranan na Fruit and Vegetable Planters Association of Carolina na compuesto nin bagong opisyales na sinda: President – Teodolfo Libuit; Vice President Angelina Rana; Secretary Lanie Bolante; Treasurer – Lorie Dalaudau; Auditor – Eden Serafin; PIO – Gina Asi; Business Manager sinda Leonora Martinez,Melinda Belga, Cristine Moral; asin Jovy Buracay.


Si dating Consejal Julian Lavadia Jr., Chairman on Fruits and Vegetables Sector of Independent Component City Agriculture and Fisheries Council iyo an saindang katuwang nganing ponan na an pagbilog kan man-ibaibang grupo nin paraoma.


Nakatalaan pang organisaron an mga paratanum nin mais, paroy, livestock mantang igua nang pig-aandam na bagong mga programa turismo.


An Department of Agriculture asin Department of Trade and Industry kabale sa saindang dudulokon nganing makatabang na mas mapaasenso an manlaen-laen na grupo nin paraoma.


An barangay Carolina iyo an may mahiwas na tanum nin mais sa ciudad mantang dakul man digdi an paraataman nin itik, manok, may mga origan asin paraataman nin manok, pato asin iba pa dawa sa backyard kan sarong familia, sabi pa ni Libuit.

Comments


bottom of page