Masarap ang Pera

Gulpi na akong nadangog na mga politiko na pig-interbyu sa TV na mayong ibang sinabi kundi an makapag-serbi sa mga tawo. An kadaklan sainda bistadong mga korap na politiko pero pagnagtararam huna mo baga mga santo. Ito palan mga “Santo santito, corazon maldito.” Pag oras nin karampanyahan huna mo sinda an pinadara kan Dios na tagapag-salbar kan mga kapobrihan. Pero pagnakatukaw na sa posisyon, personal na interes na an inaasikaso. Nalingawan na si mga magagayon na promisa sa mga tawo. Ini an mga politikong haloy ko ng sinuka.

Perang taon na akong dai nagtutubod sa promisa kan kadaklan sa mga politiko. An hiling ko sainda pare-parehong korap. Naglaog an mga iyan sa politika nganing magpayaman. Ginigibo nindang oportunidad an saindang posisyon sa gobyerno na mangurakot asin kwartahan an mga kontraktor na may manlain-lain na proyekto sa gobyerno.

Bako man gabos na politiko korap. Kaso mabibilang lang sa muro an mga politkong sinsero asin onesto. Ini an mga politikong talagang may pagkamoot sa mga tawo asin gustong mapakarhay an pagpadalagan kan gobyerno. An apud sainda “servant leaders.”

Saro sa mga politikong nahiling asin nadangog kong piginterbyu sa TV ni Malou Mangahas kan nakaaging semana iyo si Benjamin “Benjy” Magalong, an alkalde nin siudad kan Baguio.

Ibang klaseng politiko si Magalong. May sinseridad. Aram an tama sa sala, kaya ginigibo nya an tama. May prinsipyo. Kaya positibo si naging reaksyon ko sa mga sinabi nya. Pagabot sa kun ano an dapat ginigibo kan sarong onestong politiko, mayo sa kalingkingan nya sina Senador Bato de la Rosa, Robinhood Padilla, Jinggoy Estrada o maski si Luis Raymund Villafuerte.

Si Magalong deretso asin mayong pagalangan o takot na sabihon na an problema sa gobyerno iyo an korapsyon. Asin mayong ibang dapat basolon sa problemang ini kundi iyo man sana an kadaklan sa mga politiko na inbwelto sa korapsyon.

Sa opinyon ni Magalong, lutong makaw an “bidding process” sa gobyerno. Dai pa napoon an “bidding” aram na kan sarong politiko kun kiisay itatao an kontrata ta ito palan may nakua ng lagay an nasabing politiko hali sa kontraktor. An ralagayan, segun ki Magalong, napoon 10% kan kontrata. Kun minsan daa minaabot sa 20% kan total na kontrata an nakukua kan politiko, depende sa orolay.

Kun an kontrata, halimbawa, P380M, an 10% kayan na maduman sa bulsa kan politiko P38M. Dakulang kwarta an P38M kaya an kadaklan sa mga politiko nababakal an prinsipyo pagtinapalan na nin kwarta. Sabi ngani ni Magalong, may bago daang acronym an mga politiko: MAP, gustong sabihon sa Tagalog, Masarap ang Pera.

Segun ki Magalong, nawaran na sya nin pagtubod na an mga tradisyonal na politiko (trapo) pwede pang magbago. Kaya kaipohan an mga tawo mismo dai matakot i-expose an mga salang gibo-gibo kan mga politiko. Dapat makilabot sa tamang paagi an mga hobenes, mga Kristiyano asin taong-Simbahan, asin an manlain-lain na sektor sa pagbabago kan gobyerno. Dai pwedeng dai makiaram an mga tawo ta buhay ninda o kan maabot na henerasyon an nakataya. Ini an klaseng aktibismo na gustong palakopon ni Magalong.

Wow, napabilib ako ni Magalong. Mayo akong ebidensya kong korap o bakong korap si Magalong. Pero sya an enot na politiko na nadangog ko na naglibak (criticize) sa kapareho nya politiko na inbwelto sa korapsyon.

Dagdag pa ni Magalong, sabi daa sa iya kan sarong senador, tama an saiyang punto de vista na grabe an korapsyon sa gobyerno kan mga politiko. Pero an ikinangangalas ko, ano ta dai ini masabi kan nasabing senador sa publiko arog kan ginigibo ni Magalong?

Iyo man nanggad, ano ta dai masabi sa publiko kan mga “honorable” na mga kongresista, mga senador, mga gobernador, mga alkalde na: “Tama na, pondohon ta na an pangugurakot. Pondohon na an korapsyon. Magbagong buhay na kita.”

Aram ta man an rason kun ano ta dai ini masabi kan mga politiko – Sinda an tatamaan.

Ngunian na mga panahon, kaipohan an sarong ma-prinsipyong lider arog ni Magalong na dai takot kasuhan an mga opisyales na saiyang nasasakupan. Kan nakaaging taon, kinasuhan ni Magalong nin “graft cases” an mga opisyales saka mga engineers kan Department of Public Works and Highways – Baguio City District Engineering Office.

Pig-challenge ni Magalong an mga gustong maglaog sa politika o magtrabaho sa gobyerno na dapat makusog an pundasyon kan saindang pagkatao. Dapat may integridad, onesto asin dai takot labanan an mga korap na mga politiko. Segun saiya, an arog kaining mga kalidad kan sarong tawo minauswag (develop) mientras na an sarong tawo nagiging mature an pagiisip asin may moralidad.

Totoo na may kadipisilan an pagbabago sa buhay o pagbabago kan sosyudad. Kun minsan, minaabot an oras na madedesganar an sarong tawong nakikilaban sa katotoohan, lalo na kun garo mayong nangyayari. Pero, an patanid ni Magalong, dai dapat luyahan nin buot an mga tawo ta an dakulang sulo minapoon sa sadit na silyab kan kalayo.