Masbate kapot kan familia Kho
Pinatos kan familia Kho sa provincia nin Masbate an kapangganahan sa resulta kan nagtapos na eleksyon nasyonal asin lokal kan Mayo 9, 2022 puon sa cargong gobernador, bise gobernador, tolong representante kan congressional district asin sarong alcalde.
Pinangenotan kan re-electionistang Gobernador Engr. Antonio ‘‘Tony’’ Kho mantang an saiyang esposa dating 2nd district representative Dr. Elisa Olga Tincungco Kho iyo man an ganador sa cargong bise gobernador; asin an saindang mga aki na sinda Ricardo Kho ganador komo representante kan premir distrito; an bagong nakapasar sa Bar examination, Atty. Ara Kho ganador na representante kan segundo distrito asin Wilson ‘‘Tonton’’ Kho kan tercer distrito asin an saiyang esposa Tin Hao Kho nanggana bilang alcalde sa banwaan nin Mandaon.
An Masbate, declarado kan Comelec bilang elections hot spot alagad si mga de calibreng armas kan gobernador saiyang sinuko sa PNP maging kan iba pang mga politico kan provincia.
Dakul na mga de calibreng armas an sinuko kan mga politiko kan nakaaging eleksyon na saro sa resulta matuninong si pirilian, sabi kan PNP.
Familia Kho mga nanggana sa nakaaging eleksyon kan Mayo 9, 2022 (hale sa wala sundo sa too) kinababalihan ninda Congresista Ara Kho, Mayor Tin Hao Kho, Congresista Wilson ‘’Tonton’’ Kho, Bise Gobernador Olga Kho, Congresista Richard Kho asin Goberndor Antonio Kho. (Tonton FB Page)
An esposa kan gobernador na si Dr. Olga, dinaog niya si Jesi Howard Lanete, aki ni dating goberndor Rizalina Lanete. Si Richard Kho, dinaog si dating Rep. Marvi Bravo kan premir distrito, sa segundo distrito dinaog kan saro pang aki ni Kho, Atty. Ara si Dr. Scott Davies Lanete, tugang ni Jesi Howard sa tercer distrito saro pang aki ni Kho, napili liwat si Wilton saiyang dinaog si Rizalina Lanete.
Si Gob Kho, nag-atubang nin casong murder ki Tito Espinosa kan 1995 alagad acquitted sa sinambit na caso kriminal.
Nagcandidatong alcalde kan Cataingan, sa sunod na eleksyon nanggana komo 3rd district representative kan tercer distrito kan 1992.
Kan 1998 nanggana komo gobernador matapos ganahon niya an election protest contra ki gobernador Emilio Espinosa Jr. kan 1995 gubernatorial election. Kan taon 2007, matapos kan saiyang tolong taon na termino bilang gobernador, naging representante kan segundo distrito. An saiyang esposa Olga nagribay sa saiya na parejong dinaog ninda an Espinosas na nagdalagan sa kaparejong posisyon.
An Masbate mayaman sa natural resources, sarong 3rd class province sa Bicol kan mga nakaaging decada pinadalagan kan familia Espinosa alagad sa nagtapos na eleksyon nagpadagos an political dynasty sa familia Kho.
An gobernador na iyo an nagtapos kan dinastia kan mga Espinosa asin ngunian sinda an nagribay, nagpuon sa politika bilang municipal councillor kan 1988 hasta 1992.
An dinastia politikal prohibido na sa 1987 constitution alagad huli sa kawaran nin implementing rules and regulations padagos na nagdadanay mala ngani sa Camarines Sur yaon an familia Villafuerte asin Fuentebella maging sa Ilocos region an lugar ni presumptive president Ferdinand Marcos Jr. an saindang familia kapot na an sinambit na rehiyon maging an familia kan paluwason na Presidente Rodrigo Duterte kapot man ninda an provincia nin Davao.
Kun babasahon an ley ‘‘The 1987 Constitution of the Philippines States in Article II Section 26: The State shall guarantee equal access to opportunities for public service and prohibit political dynasty as may be defined by law’’.
Apesar kan probisyon sa konstitusyon, solamente an Sangguniang Kabataan Reform Act of 2016 an nag-iimplementar kan mapadapit sa ley kan political dynasties sa Filipinas.
Iginilid sana kan gobierno an ley sa political dynasty kan 1987 constitution huli kaini, lakop na sa manlaen-laen na provincia an kaparejong isyu.
An Masbate, afuera kan mayamang sa recursos naturales kadakle kan hanap buhay digdi iyo an pag-oma, livestock and poultry raising, mantang si yaon sa coastal an industria sa pagsira, mahiwas an koprasan, asin an provinciang ini ika-duwa sa Bukidnon sa nagsusuplay nin baca sa Metro Manila asin mga provincia sa Visayas. (DPAureus)