Masbate nagdeclara na nin state of calamity

Nagdeclara na nin state of calamity an gobierno provincial kan Masbate sa paagi kan resolution number 164-2025 kan Sangguniang Panlalawigan matapos kan dakulang destroso digdi huli kan bagyong Opong kan Viernes, Septiembre 26, 2025.

An declarasyon nganing mapadali an pagpaluwas nin fondo kan LGU para sa relief operations mantang ribo-ribo pang evacuees an saindang pigsusuplayan nin pagkakan aroaldaw huli ta nagkagaraba an saindang estaran.

Sa pinaluwas na report kan opisina ni Gobernador Richard Kho hale sa Provincial Disaster Rish Reduction Management Office nasa 16,000 na familia o 57,000 na indibidwal an naapektuhan kan calamidad, mahiwas na danyos sa agricultura, infrastraktura, mga nagabang kaharongan, pagkulang-kulang nin suplay nin tubig inumon, magin sa serbisyo kan kuryente asin kamunikasyon mantang kaipuhan pa ninda an tabang sa serbisyo medical. Sinabi man kan OCD tolong mga residentes an binawian nin buhay huli kan calamidad.

An provincia nin Masbate iguang 20 municipalidades asin sarong ciudad anas apektado asin maabot sa 200 na barangay an dakula si destroso.

‘‘Bangon Masbate’’ an saindang slogan matapos kan calamidad sa tahaw kan pagtarabangan kan manlaen-laen na sektor sa provincia.

An opisina rehiyonal kan DSWD asin central office katuwang an Office of Civil Defense sa koordinasyon sa mga LGUs nagkaigua na nin relief operations.

Sa lado kan Department of Health Bicol, sinabi ni Regional Director Rosa Maria Rempillo, duwang truck na mga health commodities siring kan hygiene kits, water containers, asin mga bulong na nagcacantidad nin Php1.4 milyon an saindang pigpadara sa mga apektado nin calamidad.

Dakul na mga kaharongan sa Masbate mga nadestroso ni Bagyong Opong na apektado an 182 barangay mantang sa retrato kua kan LGU San Fernando, Masbate sa toong retrato nagtatabang na an PNP sa clearing operation.