Matnog, Magayon Na Lugar

Sa pinaka premirong pagkakataon, nakatungtong an sakuyang mga bitis sa kadagaan kan provincia nin Sorsogon. Sa pag agda kan sakuyang familya na mag tour kami sa Matnog, siempre dakula an sakuyang kaogmahan ta mahihiling ko ang nag aasensong lugar kan Sorsogon na bistado sa may magayon na tinampo asin bihira ang re-blocking bakong arog digdi sa Camarines Sur, lalo na sa paglaog haling provincia nin Quezon. Sa pag abot mi sa Matnog, hinanap ko tolos ang Puerto na iyo an lugar nin mga darakulang barko na pig lulunadan nin mga Buses asin mga kotse, asin mga ginatos na pasahero na mabalyo duman sa Allen sa provincia nin Samar. Maogmahon pag hilingon na ang mga darakulang Buses na hale pa sa Cubao ang nakapila sa pag laog sa barko. Haros 4 oras palan an bihaye kan barko paghale sa Matnog abot duman sa Allen ta bako man marikas an saiyang dalagan, alagad kun motor boat ang gagamiton kayang magdalagan nin 2 oras sana. Sadit sana man an centro kan Matnog na nakaka hawig sa centrio kan Calabanga. Mantang samuyang pinag hahalat ang lantsa na samuyang lulunadan sa inaapod na island hopping naisipan kong mag istanbay sa mercado asin makipag istoryahan sa mga tawo duman, an saindang tataramon inaapod na bisakol ta pinag halong bisaya bikol, alagad tatao sindang mag intiende nin bikol-naga. An Matnog iguang malinig na kadagatan kolor azul ta haranom an dagat digdi kaya igua nin Puerto. Kadakol saradit na isla an nakapalibot sa Matnog, arog kan Tikling island, na garong pulbos ang baybayon nakaka hawig siya sa Aguirangan Island, yaon man ang Fish Sanctuary na mahihiling an mga sirang dakula na nagkakan kan pig dadaklag na feeds, ang mga ini nalalaom sa mahiwas na fish net kaya dai sinda nakakadulag alagad bawal na dakupon asin banwiton. Kun makarigos sa laog kan fish sanctuary dapat magbalnaw muna an tawo tanganing mahali an ano man na skin lotion sa lawas tanganing dai mahilo an mga sira. Ang kada dumanan na saradit na isla asin kueba, igua nin dalagan nin oras na 15 minutos, sagkod na nagduman kami sa mala Boracay na beach na inaapod Subic Beach. Ini may pinong pinag halong rosa asin puti na baybay. Mafresko an lugar bastane sa malinig na tubig asin kumpleto sa koryente asin wifi. Malinigon an dagat , asin mayo nin anuman na basura, alagad medyo maalon sana an lugar dara kan ini naka atubang na sa mahiwas na kabisayaan. Sa pagpuli mi nag agi kami sa Bulusan Lake, tanaw ang poro kan bulkan. Duwang aldao pagkalihis, an bulkan nagtuga, kaya naisip mi na an mga tawong nag aasikaso samuya sa may Bulusan lake an siguradong nagpuruli ta bawal duman mag tener an tawo kung nagtutuga ang Bulkan Bulusan.