top of page

May A-Beinte Pesos nang Bagas

  • Writer: Bicolmail Web Admin
    Bicolmail Web Admin
  • 3 days ago
  • 2 min read

Nagkatotoo man nanggad ang a-beinte pesoson kada kilo nin bagas, nagpoon ilunsar ini sa Visayas, asin kan Hunyo linunsar ini sa Bicol. Napangyari ang saro sa mga plataporma de gobierno kan satuyang Presidente ngonian alagad igua ini limitasyon asin kondisyon. Ang bagas na P 20.00 ang kilo, para sa mga minimum wage earners na trabahante, puede sinda makabakal 10 kilos kada bulan kan produktong ini.


Halat sana muna. Hilingon ta daw ini sa perspektiba kan satong mga paraomang nagtatanom paroy. Kan nakaaging bulan man, ang City Agriculture Office kan Ciudad nin Naga nagkondusir nin Farm Income and Expenses Survey. Inenot sa survey ang paratanom paroy ta ini ang sektor na nakakadanas nin pagkalugi. Ini ginibo tanganing magkaigwa nin malinaw na litrato ang opisina kan gastos asin kita sa pagprodusir nin paroy. Sa orolay mismo sa opisina habang sinusurat ko ini, may nakasabi na uminabot nang P 9.00 hanggang P 10.00 ang presyo kan paroy. Yaon kita sa panahon na dakul supply nin paroy.


Segun sa survey, ang sumadang gastos sa pagprodusir nin paroy sa sarong ektaryang tanuman, nag-aabot nin P 40,000.00 pag Certified o Inbred na variety asin P 55,000.00 pag Hybrid. Ang fertilizer o abono naglaog nang P 8,000.00 ang gastos na halos pareho man sa gastos sa land preparation. Ang kantidad kan land preparation dara kan mahal na labor cost na naglalaog na sa P 450.00- P 500.00 ang aldawan. Ini uyon sa report kan Philippine Statistics Authority (PSA) kan 2022, ang kawsa nin halangkaw na gastos sa pagprodusir nin paroy iyo ang mga inputs arog kan banhi, abono, pestisidyo, asin iba pa.


Ang gastos sa pagprodusir kan kada kilo nin paroy digdi sa Bicol kan taon 2023 naglaog P 14.92 (PSA Data). Kung ang babalikan ta ang presyo nin pagbakal paroy ngonian na P 10.00 asin isara tang P 15.00 ang gastos sa kada kilo, lugi ang paratanom nin P 5.00. Lugi ang kabuhayan. Garo pati bakong tama ang terminong “kabuhayan” kung dai man ini nakakadagdag ginhawa sa buhay kan paraoma.


Ang nahihiling tang pinakamarikas na remedio kaini, ang pag-implementar nin Balanced Feritlization Strategy, digdi may mga inputs arog kan biological nutrients na mas barato asin makakabawas sa gastuson sa pagprodusir. Ang mga ayuda hale sa Department of Agriculture (DA) RFO 5 tanganing lalo pang makagian sa gastos. Ang banhi nagkakantidad poon P1,700 (inbred) hang P 5,000.00 (hybrid).


Ang marketing kan bagas may makusog na impluwensiya sa demand kaini na madara nin marhay na presyo dara kan marhay na kalidad. Ini mapapangyari kung magamit nin mga marhay asin angay na makinarya sa produksyon asin facilidad sa pagproseso.


Malinaw na direksyon asin marhay na pag-gobernar. Nagpoon na ang liderato kan satuyang pinakaenot na babaeng alcalde, Mayor Leni Robredo. Ang mensahe, silag asin episyenteng lokal na gobierno kan Ciudad nin Naga. Nagtutubod kita digdi. Nagtutubod kita sa “Ika, ako, kita an Naga”. Ang liderato kasabay kan responsableng konstituwentes sa progreso dara kan pusog na padalagan. Awot pa, ang sektor kan paraoma asin parasira mas pang mapaorog.

Comments


bottom of page