May bitbit nin Covid-19 dai makalusot sa border control

Pili, Camarines Sur --- Dakulang bagay an Del Gallego Border na binugtak kan Capitolyo Provincial kan CamSur sa linderos kan provincia nin Quezon nganing makontrol an mga returning residence na posibleng may bitbit kan nakakaulakit na Covid-19 hale sa National Capital Region na iyo an epicenter kan virus.

Puon na maging activo an Del Gallego Border na 24/7 pinapadalagan kan Provincial Disaster Risk Reduction Management Council kan gobierno provincial katuwang an Philippine National Police, LGU Del Gallego asin Land Transportation Office maabot na sa 95 returning residence na pigkuanan nin antigen test an nagpositivo sa coronavirus disease asin dagos nang dinara sa isolation center.

Saludo si Gobernador Migz Villafuerte sa saiyang mga taohan na nagpapadalagan kan Del Gallego Border na kun nakalusot an 95 nagpupuroli sa Camarines Sur na positivo sa virus asin nagpuroli sa saindang residencia mas mahiwas lugod an pagkalat kan Covid-19 alagad nakontrol ini sa paglaog pa sana sa border control.

Bako lang sa pagbantay kan posibleng may tama kan virus alagad si mayong mga travel requirement na pigmamando kan Bicol inter-agency task force dai tinutugot na maglaog sa Camarines Sur envez pinapabalik sa NCR o sa saindang pinaghalian na lugar.

Golpi an nagpuprobar na magdurolag nganing makalusot sa paagi sa paglunad sa van asin sa isket sa relis kan train alagad dai sinda nakakalusot sa mga awtoridad.

Dakul na ilegal na bagay an ginigibo kan ibang mga returning residence, dai sinda nakakalusot sa mata na nakabantay sa border control asin sinda pig-oomaw kan joven na gobernador.

Maging an personajes kan LTO labi na sa 60 mga kolurom na van maging truck na nag-tatransportar nin pasajeros an nagkadarakop.

Dakulang bagay an grupo sa border control nganing makatabang sa gobierno sa campanya contra sa deadly virus, sabi pa ni Villafuerte. (DPAureus)