May Eleksyon Daw?



Ngonyan na tapos na an Semana Santa mabilang kita nin anom na bulan o kabangang taon na sana ma-plantear na nin certifico de candidatura an mga aspirantes poon Presidente kan Pilipinas, Vice-Presidente, senador, deputado, gobernador, bokal, alkalde sagkod sa pinakahuring konsehal nin mga banwaan asin ciudad asin partylist patin mga nominees ninda.


Sabay na kan panahon nin pista ngonyan na Abril asin Mayo an pagpasiring sa mga baybayon tangarig magpa-fresco, masibot na an mga tao, an mga kandidato sa pagpabisto asin pagpa-gwapo saka an mga botantes asin electorado sa paghagad nin pabor.


Ngonyan na may Covid asin gabos lockdown aramon ta daw kun may pagbabago an karampanyahan.


Ngonyan na dakul an mayong trabaho, kuarta pa daw an numero unong konsiderasyon sa pagboto?


Paghuna ko iyo man giraray ta maski pa mayo na nin arabrasahan ta durutdutan na lang kan nakagugom na kama-oo, may maskara pa an kandidato asin electorado. Bawal maghadok sa aki o sa gurang, bawal na an miting de avance pero an radyo asin telebisyon asin social media padagos an pagbunga-bunga na mas mahal an bayad sa mga announcer asin kumentarista.


Ngonyan pati bako lang announcer o komentarista an binabayaran kundi an binabakal an estasyon asin an network mismo. An suheldo pati kan mga propagandista hale sa kaban kan gobyerno lalo na an kandidato na matukaw sa puwesto.


May nagsasabi ngani na an mga sobreng may laog nin kuarta iwinawalat lang sa mga harong-harong, tigsararo an kada miyembro kan pamilya na calificado nang magboto.


Igwa man daa na arog kan pagdeliver kan illegal na droga an kuartang pang vote buying pinapa-agui na lang sa smart padala, Palawan o Food Panda delivery.


Pero bakong arog sa Alemanya asin ibang parte kan Europa na an pagboto manual voting pa o pigsusurat pa. Digdi sa Pilipinas Smartmatic man giraray arog kan dati.


Dai daw magkadarayaan? Kadto manual an darayaan ngonyan smart na may atik pa?


Sabagay duman sa Amerika maski may pandemya nadagos si eleksyon kan sarong taon. Igwa man nin mga sahot nin darayaan asin anomaliya.


Sa Pilipinas an hapot iyo na sa tahaw kan labing sarong taon na kan pandemya, magulo duman sa Metro Manila bako lang sa pag-ulang kan Covid 19 virus kundi pag-ereneksyonan kan bakuna, sahot nin maluyang padalagan kan Department of Health, sahot nin kurapsiyon sa Philhealth asin mga pribadong ospital. May mga NPA, terorismo asin plano na magka-igwa nin Cha-Cha.


Madagos daw an eleksyon?