MAYO NANG NAKIARAM NA POLITICO: Pagpili kan SK federation officers pinaagi sa exams

Premiro sa Bicol asin posibleng sa Pilipinas an pagpili kan matukaw na presidente kan pederasyon sa Sangguniang Kabataan sa Goa, Camarines Sur pinaagi sa ‘written exams and interview’.

Ini an bagong inobasyon ni Alcalde Marcel Pan na pig-presentar asin pigpaliwanag sa bagong 34 pamayo kan SK kan barangays na an saiyang objetibo dai makurap nin mga politico an mga jovenes.

Alagad an proceso kan jefe ejecutivo pigponan kan Septiembre 2023 antes kan BSKE, an Local Youth Development Office kan LGU-Goa iyo an nagkunducir kan seminar sa gabos na SK candidates kan gabos na barangay.

Piglinaw ni Pan na mayo siyang susuportaran na candidato sa arin man na barangay maging sa mga ganador na mawot maging SK officials asin sinda maagi sa written test and interview asin base sa resulta, an pinaka-calificado na may halangkaw na grado sa examinasyon iyo an matukaw na SK Federation President asin an sunod na ranggo na candidato bilang bise presidente kan federasyon mantang si mga sunod ranggo iyo si sunod na mga opisyales.

Base pa sa proceso kan BSK eleksyon, sa ginibong mandatory seminar sa SK officials na pigkunducir kan saindang LGOO, Ms. Joy Domanico asin LYDO.

Inimbitaran si gabos na SK chairperson kan 34 barangay na magparticipar kun makakapasar, magkua nin exams. Si nag top iyo an magiging SK chairperson na susuportaran kan interesado man sa posisyon asin an resulta pig-onradon kan alcalde.

Sa resulta 16 sa 34 nagkua nin exams alagad 14 na sainda an nagpahayag kan saindang intension sa proceso. An panelists kinababalihan ninda Dr. Raul Bradecina, Presidente kan Partido State University; Dr. Nita Morallo, dating president kan PSU na ngunian iyo an Presidente kan Goa Community College; Carlos Centenera, kan MAFC asin an negosyanteng Cristina Rellora Monasterio, sarong UPLB graduate asin dating Presidente kan Rotary Club of Partido.

Sa resulta kan proceso si Blessky Paga, SK Chairman kan San Isidro Poblacion iyo an pasado asin si iba pang nagsunod sa mga nakapasar asin halangkaw na grado iyo an napiling mga opisyal base sa saindang ‘gentleperson agreement’ na deretso nang naging marhay si dalagan kan pirilian. Si Paga iyo na an nagtutukaw na bagong ex-officio member sa Sangguniang Bayan.

An kaparejong proceso pig-adaptar man ni Alcalde Jovi Fuentebella kan Sagñay, Camarines Sur.

An inobasyon na ini sa pagpili kan opisyales kan federasyon sa SK, igwa man naiibang programa an Ciudad nin Naga na pigponan kan panahon ni dipuntong Alcalde Jess M. Robredo sa paagi nin exams asin interview alagad para sa City Youth Officials cada panahon nin Abril asin Mayo. An may pinakalangkaw na grado sa exams iyo an matukaw na City Youth Mayor asin si sunod na mga ranggo iyo na an matukaw kan iba pang puesto.

An mga CYO igwang narerecibing sueldo base sa minimum wage law kan Department of Labor and Employment. (DPA/Manny Basa)