Mayoria kan masunod na SP kaalyado ni Luigi, Sal Jr.

An masunod na komposisyon kan Sangguniang Panlalawigan kan Camarines Sur mayoria kan mga ganador sa nagtapos na eleksyon kaalyado ninda Governor elect Luigi Villafuerte asin Vice Governor elect Sal Fortuno Jr.

Parejong joven pa sinda Villafuerte na nag-eedad sana nin 24 anyos mantang si Fortuno nag-eedad na nin 32 anyos asin iyo an pinakaenot na matukaw na joven na presiding officer kan junta provincial.


Sa sampolong mga ganador na vocal sa Camarines Sur pito an PDP-Laban na kaalyado ni Fortuno sa SP mantang tolo sa NPC na kaalyado kan nadaog na candidatong gobernador Rolando Andaya Jr.


An mga kaalyado ni Fortuno kinababalehan ninda, Waren Señar kan premir distiro; Romulo Hernandez asin Niño Tayco kan segundo distrito; Pol Manaog kan tercer distrito; Donna Onate, Shai Noble asin Julio Oliva kan cuarto distrito.


An mga oposisyon sa junta provincial kinababalehan ninda Vanesa Señar kan tercer distrito; Eugene Fuentebella asin Emmanuel Llaguno parejo kan ika-limang distrito.


Si Llaguno, re-elected na vocal sa Partido distrito piglalaoman na iyo man giraray an minority leader mantang saindang imamantenir an pagiging fiscalizer alagad kun sa karahayan kan gobierno provincial saindang susuportaran.


An bagong komposisyon kan SP maasumir sa puesto sa Hulyo 1, 2022.


An matukaw na joven na bise gobernador, aki ninda dating bise gobernador Sal Fortuno na dating representante kan Rinconada district asin kan paluwason na representante Jo ‘‘Sal’’ Fortuno. (DPAureus)