Mayoria sa ALS students sa Caramoan, mga sr. citizens

Paratukdo duwang oras an viaje nganing maabot an islang brgy.

Dawa mga senior citizens na alagad naghihikahos na makatapos sa pag-escuela sa paagi nin Alternative Learning System (ALS) kan Department of Education (DepEd) sa islang barangay kan Caramoan, Camarines Sur.

Alagad orgulyo kan mga Caramoanon na iguang paratukdo an nagsasacrificio na nagbibiyahe nin duwang oras sa bangka nganing maabot an lugar kan mga estudiantes sa Gov. M. College CLC, Tabgon, Caramoan na namumugtak sa islang barangay.

Sa entrevista kan Bicol Mail ki ALS Teacher Jean Calayo, sinabi kaini an saiyang estudiantes mga de familia na asin mayoria sainda mga senior citizens mala ngani kabale pa an sarong Punong Barangay na si Gregorio Alde kan Barangay Bakgong.

Igua siyang 75 estudiantes sa Caramoan North District, na hale sa limang pagtaraid na bukid na barangay. Pagtios an dahilan kun dai nakaklase sa tamang edad mantang prayoridad an pagbadang o pag-oma nganing makatabang sa pagbuhay kan saindang tios na familia.

Dawa nakatungtong na sinda sa edad kan senior citizens nagpadagos sa pagklase sa ALS nganing igua sindang ipaheling na diploma sa mga aki ninda dawa sabihon na gurang na sinda, sabi pa sa osipon.

Afuera sa escuelahan nagbabalyo pa siya sa limang upper barangay na sakop niyang destinong lugar na nakikigamit kan barangay hall, multipurpose hall minsan sa escuelahan maging sa residencia kan estudiantes binibisita niya nganing ipadagos an pagtukdo.

Si Calayo, dating nagtutokdo sa formal education hasta kan 2017 alagad nagbalyo sa ALS program nganing makatabang sa may edad na makatapos pag-escuela.

An DepEd Caramoan iguang tolong distrito na igua sanang Php400,000 na annual budget hale sa LGU, an fondo nagkukulang alagad an saindang espuersos mag-solicit nganing itabang sa pangangaipo kan estudiantes.

Dawa mamundo na binabansagan sinda na ‘‘professional solicitor’’ bale wala na sa sainda an importante makatabang sa pobreng estudiantes.

An estudiantes kan ALS kaipuhan maka-atendir sa klase sa sampolong bulan sa escuelahan o 800 hours sa classroom. Si mga nakatapos sa ALS program sinda mga klasificado bilang secondary level graduates asin puedeng magpadagos sa Senior High School.