MCS Grand Alumni Homecoming 2024

Ni Ernesto G. Verdaero MCS ‘62

(President, MCS Alumni Association 2002-2024)

Poco mas o menos 3,000 katao, gabos graduado o nag-aradal sa 122-anyos na Milaor Central School, an matiripon sa laog kan mahiwas na compound kan Milaor Central School (barangay Amparado, Milaor Camarines Sur) sa maabot na Mayo 3, 2024 aldaw na Biyernes.

Mayo 1 an tradisyonal na pista kan banwaan, Mayo 2 may medical mission sa laog kan eskwelahan na paparticiparan kan mga lokal na doctor, nurses asin iba pang health workers na nagtapos sa MCS asin mga imbitadong doctor hali sa provincial asin ibang banwaan.

An engrandeng okasyon, 2nd Grand Milaor Central School Alumni Homecoming guiguibuhon poon alas 6:00 nin aga sagkod bangui asin otro aldaw na maagahon.

An rinibong participantes maparada sa palibot kan mga mayor na tinampo kan poblacion, masunod tulos an misa ni Fr. Armando Tipones MCS ‘67 sa MCS covered court, pakatapos an mga participantes madiretso sa kanyan-kanyang nakadestinong tents kun saen maharampangan an dating magkakraklase, makarakan habang nag-eerestoryahan.

Pagkahapon magkaka-igwa nin eleksyon kan masunod na opisyales kan MCS Alumni Association. An kada batch may representantes na makandidato o boborotohan na masunod na opisyales: presidente, bise-presidente, sekretaryo, tesurero, business managers, PRO asin miyembros kan junta directiva.

An mga mapipiling opisyales papasumpaon sa Induction Ceremony pagkabangui antes kan barayli o auditorium. Kun todo patin aasisteran nin dakulang banda, sikat na sound system, may baraylihan, rigodon asin pantomina.

Sa pantomina sana na paparticiparan kan mga matitibay na baylarina piglalaoman na makakalikom na dakulang fundo para sa manlaen-laen na proyektos kan alumni association.

An Grand Alumni Homecoming kan taon na ini pigpapadrinohan kan MCS batch of 1976 na pinapamayuhan ni Lucena “Che” Nullan Bermeo, Dr Eleazer Babilonia, Nelly Totaήez asin iba pa na sarong taon na pinaghandaan an dakulang okasyon.

Poon kansurongtaon 2023 bulan-bulan na may general membership meeting sa Milaor Cultural Center nganing pag-orolayan an mga nakatalaan na aktibidades asin proyektos.

Aktibong marhay an participasyon kan Milaor Central School administration sa pamamayo ni Principal Raul San Vicente.

Kaibahan sa mga dakulang proyektos ngunyan iyo an sarong covered court na istambayan asin kawatan kan mga eskwela kun odto, mga gates o trangkahan kan eskwelahan, mga lamesa asin tukawan para sa mga eskwela asin paratukdo.

Sabi kan parataram kan Batch 76 mayo nin politika an okasyon pero mahagad tabang sa mga politiko sa paglikom nin dakulang fundo asin paguibo kan medical mission.

Si alkalde Anthony “Lhabas” Reyes nangako na madonar nin 100 mil pesos para sa bagong edeficio; an manlaen-laen na batches may kanya-kanyang desinyo kan saindang isusulot na uniform durante kan parada pero an gagamiton sa auditorium “wear your best” daa.

An primerong grand alumni homecoming kan eskwelahan kan 2002 kan magcelebrar ini kan ika-100 na anibersaryo poon pundaron kan mga Amerikano kan 1902.

An MCS sabay na binuksan sa Camarines Sur National High School kan 1902 pakahali kan mga Kastila. Nag-arabot kadto digdi sa Pilipinas idtong mga pigbabaransagan na “Thomasites” o idtong voluntaryong paratukdong haling Amerika na nakasakay pasiring Pilipinas sa higanteng barko na pig-aapod USS Thomas.

An mga puting maestros Y maestras na matitibay mag-English pigwarak sa man iba-ibang parte kan Pilipinas tanganing magbukas nin mga eskwelahan asin guibohon colony nasakop kan America hali sa kamot kan mga Kastila.

Kun sa labing 300 na taon kan rehimen kan mga Espanyol dae pigpa-ereskwela an mga Indio (mga Pilipino) an mga Kano kan sakopon an Pilipinas tinurukduan tulos mag-English asin mag-ereskwela abot Grade 7 na puede nang maguin maestro y maestro na halangka an sweldo. An iba sainda guinibong pensyonado, pina-eskwela sa Estados Unidos asin pig-recruit bilang miyembros kan US Navy o asin US Army.

An Milaor Central School famuso sa mga graduadong naguin sikat na paratukdo mala ta may naguin awardee bilang Outstanding Teacher of the Philippines, may mga doctor o doktora, may mga abogado Y abogada, may mga engineers, architechs, PMAyers, police officers, firemen, nurses asin kadakul-dakul na educador.

Igwa man mga parauma, karpentero o panday asin siyempre mga tsuper asin mga parapadyak.

Matiripon an gabos, pobre asin mayaman, sa pag-orgolyo kan edukasyon sa banwaan asin pagpasalamat sa mga responsible sa pagtao nin pagkanood sa mga taga-Milaor sa laog nin sobra 120ng taon.