Media, midya-midya o propagandista (parabatok)?

75% sagkod 80% kan mga radyo sa Naga, Iriga asin Camarines Sur kun bakong saderi, kontrolado nin politiko asin pamilya nin mga politic ko.

Ngonyan na nagdadangadang na an eleksyon presidential asin lokal sa Mayo nurong taon 2022, maririsa na sa mga programa maguin AM o FM, public affairs, musical, request and dedication an tanog politika.

An natatadang sa 20% kun bakong saderi nin mga negosyante na may mga malls asin mga food supplement products, mga sanga o local station kan mga higanteng network sa Metro Manila.

Sa mga press conferences o media briefings beristado man an mga representante kan political stations saka bako. Sa mga hapot pa lang aram na, lalo na sa mga intrigas.

Maski an mga request and dedication may paipit nang politika, maski an pagpatugtog nin musika lalo na sa mga live streaming sa facebook na nakakaabot kun saen-saen orog na sa mga pigtratrabahuhan kan mga OFWs na sige man an daralan.

An mga para-antabay sa abroad may impluwensya man pati sa borotohan sa masunod na eleksyon. An saindang hinghing kun siisay an ibobotong presidente, gobernador, mayor o congressman may kalakip pang dolyar, euro o kun ano ang klase kan kuartang pig-susueldo sainda duman.

Arog kaiyan an poder asin influencia kan media satuya.

Kaya an mga politiko dai na nasusupog na magbakal nin estasyon o mag-arkila tanganing an radyo iyo an magbalangibog kan saindang kampanya sa politika.

Kadto daw kan dekada 60 maski kan martial law sagkod dekada 70 mayo kan arog kaiyan.

An field reporting kadto medyo aktibista na pero mayong politika.

Pero kan mag-abot amay na parte kan dekada 80 dahil sa iwal kan mga maka-Marcos asin maka-Aquino nagpoon na an burulyada. Pero an taga-media aktibo pero dedma sana. An iba ngani nagsasakat pa sa bukid pag-interview kan mga NPA.

Pag-EDSA Revolution nagkabaranga na pero an mayoriya kontrolado na kan Cory Administration lalo na an ABS-CBN.

Ngonyan na mga ngonyan an mga taga-media ribong kun siisay talaga sinda: taga-media o propagandista o parabatok sana.

Parte kan pighahalian kan saindang sueldo dai ninda madeterminaran kun hali sa gobyerno, hali sa parabayad nin buwis, parabakal sa saod o parabakal nin mga herbal medicines, food supplements asin parokyano kan alternative medicine biznesmen.

Maheheling ta sa resultado kan masunod na eleksyon kun sairisay an magarana: an manok kan mga dinastiya, kan mga nagkokontrol kan KBP o kan mga darakulang negosyante.

Antabayanan.