Merendalan

Bako lang tolong beses nagkakakan an sarong Pilipino kundi sobra pa aro-aldaw.

Pamahaw, pangudto asin pamangui pero igwa pang pag-ultanan pagka-aga, pagka-hapon asin kun minsan pag-matanga pa (media noche).

An apod kaiyan merendalan o isnak sa panahon na ini.

Pagka-aga mga-alas 10:00 an Pilipino makakan nin sopas o mamon asin mainum nin kape, softdrinks o lemonada. Pagka-hapon mga alas 4:00 makakan nin baduya o sinapot sa Rinconada, sinuman, latik,ibus, loglog o kun ano an mamaru-maro.

Sa mga trahabador arog kan parauma asin paratarok, panday, paralagadi madaling magutom dae pwede pati an tinapay sana madali sindang mahalop.

Naguiguiromduman ko kan aki pa ako namerendal pa ako nin linubak, linabunan na kamote asin batag na saba, ibos na may kasabay na tsokolate asin tinutong na bagas. Iyan sa baryo bakong sa ciudad.

Igwa pang bungkukan, namo, pritos na batag na saba (diit an lana) asin iba pang duma na dakul sa mga baryo, uma asin kadlagan.

Ngunyan sa modernong panahon makape-kape pagka-aga asin tinapay na may palaman an pinaka-maogma bako lang sa Naga kundi sa poblacion nin banwaan iyo kun may baduya, kalingking na mas masiram kesa French fries sa fastfood, may tabugtabog, bihon, kinalas asin lomi na maski tubig sana an inomon mababasog ka na asin salbado na sagkod pamangui asin matanga.

Sisay masabi na dae kita makarakan, na gurutom kita asin grabeng pagtios bastang mahigos magtanom, magluto nin merendalan dae nungka kita mahahalop asin perming makusog an lawas tanganing magtrabaho asin maguin maogma sa buhay sa ibabaw kan kinaban.

Kun iisipon gabos na iyan bararato lang pwedeng guibohon sa sadering harong, dae na kaipuhan magbakal an importante ogma kita kan satong guiniguibo, magtrabaho, magluto, magkakan asin mabuhay na matiwasay.