Mga ahencias sa agricultura tiniripon kan PRDP Bicol

Nagtutubod an Independent Component City Agriculture Fishery Council-Naga (ICAFC) na magkakaigua nin marhay na bonga an pinaapod na miting kan Philippine Rural Development Program (PRDP)-Bicol sa manlaen-laen na ahencias nganing tukaron an saindang mga kanya-kanyang program para sa sektor nin paraoma.

An miting ginibo kan nakaaging aldaw sa ICAFC Main Office sa Barangay Carolina na presente an mga representante kan Department of Agrarian Reform (DAR), Department of Agriculture (DA), Department of Trade and Industry (DTI), Department of Labor (DOLE), TESDA, DSWD asin ICAFC na pinamamayohan ni Alfredo Gatungay mantang presente man si City Agriculturist Jap Asence kan lokal na gobierno kan Ciudad nin Naga.

Si dating Consejal Julian “Mang Julian” Lavadia Jr., Director kan ICAFC asin master of ceremony kan actividad nagsabi an Team Leader kan PRDP na si Marie Cuya iyo an nangenotan sa miting mantang an manlaen-laen na ahencias de gobierno nagsumiter kan saindang mga programa nganing i-adaptar kan mga paraoma.

Si Lavadia bilang director kan ICAFC sa lado kan vegetable sector, nagsabi na ‘'historic’’ an pinaapod na miting huli ta presente si gabos na ahencia orog na sa lado nin agricultura na mayor na katuyohan matipon kan PRDP an mga kanya-kanyang programa sa sektor nin paraoma nganing itulod an pag-uswag asin pag-asenso kan sinambit na grupo.