Mga badil, tambak na bala, bomba nadisobre kan militar sa Masbate

Bako sanang dakul nang mga nagsusurokong rebeldeng New People’s Army (NPA) sa gobierno envez mga nabababawing badil, mga tambak na bala na gamit nin de calibreng armas, bomba asin iba an nadidiscobre kan mga tropa kan 2nd Infantry Battalion kan Philippine Army sa magkasuhay na Brgy kan provincia nin Masbate.

Kinumfirmar sa Bicol Mail ni Major Frank Roldan opisyal na parataram kan 9th Infantry Division kan Philippine Army na may base sa Camp Elias Angeles, Barangay San Jose Pili, Camarines Sur.

An 2nd IB pinamamayohan ni Lt. Col Lazaro D. Quigao Jr. namay base sa Masbate mantang an mga nabawing armas asin bala, sinabi ni Roldan nangyari kan Agosto 29, 2025 sa Barangay Libas, Placer asin Sitio Nainday, Purok 7, Brgy Antipolo, Palanas parejo sa provincia kan Masbate. An mga armas na narecober kan soldados kinababalehan kan sarong M653 Carbine, duwang homemade shotgun, pitong anti-personnel mines, sarong claymore mine (improvised), sarong hand grenade HE. pitong molotov, apat na riffle grenade HE asin 240mm HE mantang kabale pa sa nasamsam iyo an tambak na manlaen-laen na clase nin mga badil.

Nagpasalamat man si MGen Almase, Commander kan 9th ID sa Bicol sa mga sibilyan sa padagos na pagsuporta sa sainda sa paagi kan tinataong mga impormasyon laban sa mga kalaban kan gobierno.

Nagtutubod an 9th ID na padagos nang paruro an kamugtakan kan mga rebeldeng NPA sa Bicol mantang ginatos nang activong rebelde asin suportadores na nagsuroko kan saindang mga armas na maresulta sa pagtapos na kan problema sa insurhencia sa rehiyon Bicol.