Mga candidato sa CamSur pinaluwas na kan Comelec

Pinaluwas na kan Commission on Election (Comelec) kan Camarines Sur an kumpletong listahan kan limang mga candidatong goberndor asin limang candidatong bise gobernador sagcod sa huring aldaw kan pagsangat nin certifico de candidatura (COC), alas 5:00 nin hapon kan Oktubre 8.

Alagad si dating congressman Rolando Andaya Jr. na candidatong representante kan premir distrito andam mag-aprubetsar kan ‘‘substitution’’ hasta sa Noviembre 15, 2021 nganing magcandidatong gobernador kun si 2nd district Congressman LRay Villafuerte iyo an maglaban sa cargong gobernador.


An representante kan segundo distrito dai paman napaluwas kan saiyang reaksyon sa angat ni Andaya.


An mga candidatong gobernador na nagplantiar kan saindang COC kinababalihan ninda Luigi Villafuerte, tugang ni Gobernador Migz Villafuerte (PDP Laban), Bise Gobernador Imelda Papin kan Partido Federal ng Pilipinas (PFP), Russel Bañes (NPC), Ireneo Bongat (Ind), asin Richard Cabal (Ind).


Sa mga candidatong bise gobernador kinababalehan ninda, Vokal Nelson Julia (Ind), Salvio Patrick Fortuno Jr. (PDP Laban), dating bise alcalde Ramonchito Robles (Ind) kan Calabanga, CamSur, Vokal Jayjay Pilapil (NPC), asin Romeo Nacario (Ind).


Si Villafuerte an saiyang ka-tandem iyo si Fortuno; Papin-Julia tandem; asin Bañez-Pilapil tandem.


An mga kalaban na candidatong gobernador ni Villafuerte huring mga aldaw na nag-desisyon kan saindang candidatura.


Sa cargong congresista sa premir distrito, dating congressman Rolando Andaya Jr. kalaban an saiya man sanang pinsan na si Anthony Huribata; sa segundo distrito incumbent Congressman LRay Villafuerte contra Ronnie Amasola (Lakas-CMD); sa tercer distrito sinda incumbent Congressman Gabby Bordado, Joel Cadiz asin Sulpicio Roco Jr. sa cuarto distrito sinda, incumbent Congressman Arnie Fuentebella asin Anjo Yllana; asin sa ika-limang distrito, alcalde Madel Alfelor kan Ciudad nin Iriga asin Gobernador Migz Villafuerte.


Mientras tanto, hayahay an laban ni Cong LRay sa segundo distrito mantang an saiyang kalaban kun mayo nang ‘‘substitution’’, sarong tsuper asin bodyguard kan sarong dating congresista kan kaparejong distrito. (dpa)