Mga classroom sa full F2F classes makulang - DepEd

Preparado na sa full face-to-face classes na masikad sa Noviembre 2, 2022 an Department of Education (DepEd) sa Bicol alagad nagpapadagos pa kan saindang mga ginigibong inbentaryo sa kakulangan nin mga classroom.

Si Regional Director Gilbert Sadsad nagpahayag sa Bicol Mail sainda nang ipapasunod an full face-to-face classes an problema dai pa gabos mantang an ibang mga escuelas publica dai maka limang aldaw na ‘‘in person classes’’ mantang nagkukulang pa an mga classroom.

An saindang ginigibong inbentaryo nganing madeterminaran kun arin talagang mga escuelahan dai pa gabos maka limang aldaw cada semana kan ‘‘in person classes’’.

Mga paraadal sa pampublikong mga eskwelahan liwat magiging sibot sa full face to face classes na nakatalaan magpoon sa Noviembre 2022.

An problemang ini huli kan winalat pang danyos sa school buildings kan nakaaging bagyo sa Bicol na dai tolos napakarhay nin huli kan duwang taon na coronavirus disease na apektado kan limitasyon sa pagluwas kan mga trabajador na pig-iimponer na mga limitasyon kan gobierno nasyonal.

An ibang mga escuelahan pinapatrabajo na an mga raot na classroom nganing magamit sa burokasan nin klase sa Noviembre 2022.

Sinabi pa kan DepEd na enot kaini, labi na sa 50 por ciento kan mga pampublico asin pribadong escuelahan sa Bicol nagpapasunod na kan limang aldaw na in person classes.

Segun pa sa datus igwa nang 2,544 hali sa dating 4,469 sa total na mga escuelahan an nag-iimplementar na kan in person classes sa tahaw kan plano kan DepEd central office na dapat sa Noviembre 2.

Si Bise Presidente asin DepEd Secretary Sara Duterte nagpaluwas nin orden na iimplementar na sa masunod na bulan an full F2F classes na pinapaboran man kan mga magurang asin estudiantes.

Enot nang sinabi ni Sadsad na maging an mga paratukdo pabor sa pagbuelta kan ‘‘in person classes’’ nganing matutukan ninda an pagtukdo sa mga estudiantes.

Sinabi kan ibang paratukdo haros doble an saindang trabajo sa blended learning kan panahon nin pandemya . (dpa)