Mga dai ‘‘fully vaccinated’’ bawal sa hotel, restaurant

An Incident Management Team (IMT) kan lokal na gobierno sa Ciudad nin Naga pinapasunod sa manijamiento kan mga restaurant asin hotel na bawalan maglaog sa saindang establisimiento an saindang mga parokyano kun dai pa ‘‘fully vaccinated’’.

Alagad kun sinda bakunado na nin duwang veces dapat tawan nin cinco por cientong discuento.

Si professor Renne Gumba, jefe kan Public Safety Office asin pamayo kan IMT nagpahayag an guidelines na ini estricto nang pinapasunod sa Ciudad nin Naga na nasa alert level 4 pa siring kan ginigibo sa Metro Manila asin base sa Acta Republica 11332.

Nag-iimplementar kaini an City Hall nganing dakul an magpa-bakuna mientras na sunod-sunod na an pag-abot kan suplay kan vaccines hale sa DOH.

An mga kasugoan na ini sa mga restaurant asin hotel epektibo sana sagcod na nasa irarum kan modified enhanced community quarantine (MECQ) an ciudad puon kan Oktubre 1 hasta 15.

Piglinaw man ni Consejal Sonny Rañola, pamayo kan Committee on Health sa Sangguniang Panlungsod na mayo sindang pinasar nin ordinansa nganing estrictong ipasunod kan mga restaurant asin hotel asin tugotan sanang makalaog sa saindang establisimiento si ‘‘fully vaccinated’’ mantang igwa nang guidelines kaini an national IATF.

Si Alcalde Nelson Legacion enot nang nagsurat ki Secretary Francisco Duque kan Departamento de Salud (DOH) na ibaba an Naga sa general community quarantine (GCQ) with heightened restrictions mantang an City Hall nag-iimplementar na kan weekend ECQ lockdown na sagcod sa ngunian mayo nin aksyon.

An national IATF kaayon an Naga sa mga provincia asin ciudades na sinakat an quarantine classification sa MECQ.

Sa ngunian nagbaba na an caso kan Covid- 19 alagad saindang pig-iimplementar an ‘‘movement restrictions’’ afuera kan pag-estricto sa mga border control, sabi pa ni Gumba.

Alagad pinapa-girumdum giraray kan IMT sa publiko na magsunod sa health and safety protocols. (dpa)