Mga ECs sa Bicol sunod-sunod sa pagpalangkaw tarifa sa kuryente

Apektado na an tarifa kan mga electric cooperative (ECs) sa Bicol sa padagos na pagnipis nin suplay sa kuryente na nagreresulta sa sunod-sunod na paglangkaw sa singil sa kuryente.

Sinabi ni Rinner Bucay, opisyal na parataram kan Camarines Sur II Electric Cooperative (Casureco II), lampas nang sarong bulan an padagos na pagpasa-irarum sa Yellow asin Red alert kan Luzon Grid huli sa pagnipis o kakaposan sa reserbang kuryente na nalangkaw man an ‘demand’ ngunian na panahon nin paltik.

An epekto kaini, nalangkaw an presyo sa Wholesale Electricity Spot Market (WESM) sagcod nalangkaw an binabakal sa suplay nin kuryente mala ngani nagtaas naman an tarifa sa bulan nin Mayo 2024 sa Casureco II na nag-abot na sa P10.75 sa residential, P9.88 sa low voltage, asin P9.04 sa high voltage.

Poon kan bulan nin Marso, Abril, asin Mayo sunod-sunod an pagpasa sa halanglaw na singil sa tarifa sa miembros-consumedores kan ECs.

Alagad nagpatanid pa an Casureco II posibleng liwat magpatong naman sinda nin dugang na tarifa sa sunod na bulan nin Hunyo kun magpapadagos an problema sa enerhiya.

Sa Casureco I sa Libmanan, Camarines Sur na sakop an mga banwaan sa segundo distrito asin primer distrito nagsakat na sa P10.44 sa residential asin P9.38 sa low voltage.

Maging iba pang mga cooperativa nin electricidad sa Bicol sinasapo na an halangkaw na tarifa kan mga miembros-consumedores.

Sa Albay Electric Cooperative (ALECO) sa Island an singil sa residential P10.5909 sa low voltage – P10.0223 mantang sa Mainland an singil sa residential – P8.6791, sa low voltage – P7,6987 asin sa high voltage – P5.9528.

Sa Sorsogon II Electric Cooperate (Soreco II) sa residential nag-aabot na sa P12.4364.

Halangkaw an consumo nin kuryente ngunian na tag-init alagad hagad kan ECs sa miembros consumedores na magtipid sa paggamit nin kuryente.