Mga Espiyang Drone o UFO?

“Mga UFO iyan padi, hale sa ibang planeta!”

“Espiya iyan kan China!”

“Espiya kan Iran iyan!”

Iyo ini si mga komentario kan si duwa kong amigong taga New Jersey. An tema kan urulay mi iyo an pig aapod na mga “drone.”

An drone sarong naglulupad na vehikulo na mayong piloto o pasahero. May mga drone na gamit an gasolina sa makina ninda, igwa man gamit an bateriya, elektrisidad o solar (enerhiya hale sa saldang). Igwang saradit na drone asin igwa man mga drone na arog kadakula kan sarong minivan.

An nag papa dalagan kaini pwedeng nasa harayo o haraning lugar gamit an apod na “remote control.” Pwedeng nasa barko, sa kampo, sa parkeo, o sa ibang eroplano an nag papa lupad kaini.

Dakul an benepisyo kan mga drone. Nagagamit ini sa agrikultura sa pag laag nin mga fertilizer, pag survey sa pag gibo nin mga mapa, mag inspeksyon nin kun anong gusto mo mahiling sa mga dae naaabot kan tawo, mag video o mag retrato nin man laen laen na lugar, asin dakul pang iba. Kaibanan na digdi an pag gamit kaini kan militar sa pag survey kan mga kaiwal na kampo, pag espiya, asin pag bomba gamit an drone sa mga kalaban.

Sarong bulan nang naka agi na naka eksperiensya an estado kan New Jersey nin mga pig aapod na mga “drone” na nag ruru-lupad buru-bangi sa ibabaw kan mga kumunidad ninda. Nahiling mismo kan alcalde kan sarong lugar duman (West Milford) an mga 60 drone na nag aaligid sa ibabaw kan bawal na lugar kan sarong kampo militar asin sa ibabaw kan mga reserva nin tubig kan banuaan. May mga nahiling man na nag ruru-lupad sa ibabaw kan mga harong ninda.

May insidente man na sinundan kan helicopter kan pulis si sarong drone pero marikason daang nawara. Palibut nin ilaw ining mga drone na ini pero bigla na lang daa nawawara an ilaw kun linalamag kaya masakit nang hanapon sa diklom.

Sa laog nin labing sarong bulan dakul nang tawong nag reklamo sa nangyayaring ini. Pero mayong malinaw na paliwanag an gobyerno. Sinasabi lang kan mga halankaw na opisyales ni Presidente Biden na mayo daang ikahahadit ining mga drone na ini. Mayo daa ining peligro sa seguridad kan tawo.

Pero maski na arog kaini an sabi kan gobyerno, dakul man an nagtutubod na may mga tinatago an gobyerno na habong ipaaram sa tawo.

An nangyayari ngunian dakul na mga inaapod na “eksperto” an mga nag tatao nin mga opinion ninda kun ano ining mga nahihiling sa New Jersey.

May nag paliwanag sa TV na gibo-gibo daa ini kan China ta an China daa an pinaka dakulang nag papa bakal nin mga drone sa Amerika. Kaya ginagamit daa ini kan China sa pag espiya sa Amerika.

May mga nag sasabi man sa TV na gibo-gibo daa ini kan gobyerno sa sarong sikretong eksperimento. Nag aabot na man sa ibang estado kan Amerika ining kasong ini kan mga drone.

May nag paliwanag man na bako daa ining mga drone kundi mga vehikulo kan mga taga ibang planeta na pinag aadalan an mga tawo sa kinaban na ini.

Kadakul pang mga huring-huding kun ano ining mga ini. May mga nakaka ngirit asin may mga nakaka pag tubod.

Sa ngunian may ginigibo an congreso kan Amerika nin sarong ley na bawalan an pag bakal nin mga drone na gibo sa China.

Igwa man na nag luwas na regulasyon ngunian na binawal nin sarong bulan an pag pa lupad nin drone sa duwang dosenang lugar sa New Jersey. Siguro hinahalat lang kan gobyerno ni Biden ngunian na ipasa ining mga misteryosong pangyayaring ini ki Trump na ma tukaw sa pagka pesidente sa Enero 20.

An sabi ni Trump, aram daa kan gobyerno ni Biden asin kan militar kun saen gikan ining mga drone pero dae niya maintindihan kun tano ta mayong nag papaliwanag sainda. Pinapa “suspense” lang daa an tawo.

Ano man an mangyari siguradong maluwas an katotohanan pag tukaw ni Trump sa Enero 20.