Mga estudiante malaog na sa classroom - DepEd

Makakahawas na an mga estudiantes sa limited face-to-face (F2F) classes mantang yaon na sa pag-andam an Department of Education (DepEd) Bicol na piglalaoman 100 percent F2F classes sa school year 2022-2023 alagad magdedepende sa alert level kan national IATF.

Ini kasunod kan pagpabor ni DepEd Secretary Leonor Briones na ibuelta na an escuela sa mga class room puon sa burokasan nin klase sa Agosto 22, 2022.

Si regional director Gilbert Sadsad nagpahayag na sainda nang pig-aandaman an 100 percent in person classes sa pagtugot na kan saindang opisina nasyonal.

Alagad an problema kan DepEd Bicol iyo an mga classroom na nagkararaot huli kan nakaaging calamidad na dai man napakarhay tolos huli kan pandemya, sabi pa kan director.

Sa 4,500 escuelas publica kabale an yaon sa pribado sa rehiyon Bicol igwa nang maabot sa tres mil na escuelahan an kabale sa F2F classes mientras na kadakle kan mga provincia sa rehiyon nasa alert level 1 asin 2 base sa pinakahuring classification kan national IATF.

Halangkaw na an vaccination rate sa mga paratukdo mala ngani sa 68,000 inabot na ninda an 97 por ciento mga bakunado na asin igwa pang nawawalat na 2,000 huli kan saindang mga dahilan sa salud.

Sa mga provincia na nasa Alert level 1 asin 2 tinutugot na kan national IATF an face-to-face classes alagad dapat aprubado man giraray kan lokal na gobierno.

Nagpapabor na an mga estudiante asin magurang na ipadagos na an in person classes sa saindang pagtubod na bentaje sa pag-adal kun an estudiantes yaon sa atubangan kan paratukdo.

An iba disganado sa blended learning na nagiging lawgaw sana an saindang pag-adal.