Mga fiestahan sinasabayan sa transaksyon sa ilegal na droga

Sinasabayan an Kapiestahan sa Peñafrancia sa Ciudad nin Naga o maging saen paman na ciudad o banwaan kan mga envuelto sa ilegal na droga nganing makabuelo sa saindang transaksyon sa ilegal na actividad.

Alagad an mga miembros kan Philippine National Police, Philippine Drug Enforcement Agency magin an CIDG nakaalerto sa saindang pagmanman sa mga envuelto sa ilegal na droga.

Ini an mga pahayag ni P/Col. Tyrone Dotimas alagad igua na siyang mga instruksyon sa mga pagtaraid na Municipal Police Station kan Naga City Police Station nganing estrictong ma-monitor an saindang mga actividad sagcod na maarestar. An NCPO igua man suhay na grupo kan miembros kan PNP sa pag-monitor kan mga envuelto sa ilegal na droga.

Nagtutubod an PNP huli ta sibot an mga awtoridad sa pag-mantenir kan paz y orden saindang sasabayan sa transaksyon sa droga sa Naga sa tahaw kan dakul an mga bisita sa ciudad.

Alagad segun sa Provincial Director igua sindang personahes nganing masubaybayan an transaksyon kan mga dorogista. An iba pigtutubodan na mabagsak nin droga sa Camarines Sur nganing madara sa Ciudad nin Naga na saro nin sa babantayan kan mga awtoridad.

Segun pa sa PNP CamSur saro sa saindang prayoridad iyo an paglaban sa sinambit na ilegal na actividad mantang haros cada semana iguang mga nasasamsam na ilegal na droga asin nadadakop sa ciudad maging sa iba pang mga MPS.

Kan nakaaging premirong semana kan Hulyo 2026 an PNP sa Ciudad nin Iriga naarestar na an dating miembro kan PNP na nagpapabakal nin maabot sa P540,000 na cantidad nin shabu.

An suspek pigbistong sa ngaran na alyas JoRam asin naarestar base sa search warrant asin an operasyon ginibo kan Iriga City Police Station, PDEA Bicol, Regional Intelligence Unit asin Provincial Drug Enforcement Unit.

Saro ni sa pighalimbawa kan opisyal kan PNP na padagos an saindang paglaban sa droga sa provincia.