Mga hariguing turumba
Sa laog nin sobra sa duwang taon, eksaktong 27ng bulan dakul na mga baskugan antes kan Marso 17, 2020 kan mag-abot an Covid 19 pandemic kan taon na idto.
An ngonyan na 2022 election year nagtaralikod na sa kinaban, dai mo lamang lalaoman na sinda mawawara ta aktibo pang marhay sa media, sa social media asin sa mga malls alagad dikit man lang ngani sainda an nagadan huli sa Covid 19 virus.
Kan 2021 enot na binawian nin buhay si Emil Saavedra sa edad na 75 naparaluya an salud asin pakabirthday niya kan Enero 15, 2021 nagtalikod sa kinaban. Si Emil an saro sa pinaka-matibay na peryodista orog na sa pagsurat sa lenguahing English. Atenista, taga Tinambac.
Nagsunod an popular na announcer na si David Dollano. Famuso asin matibay magtaram sa lenguahing Bikolnon sa aire. Dai matawaran an saiyang sense of humor na talagang mapapangirit ka habang nagdadangog sa saiyang mga platika. Helang sa kidney an saiyang ikinagadan paalihis nin tolong taon na dialysis.
Si Vic David an may saderi kan Farm Radio FM na taga Tarusanan, Camaligan. Sarong dating radio technician biglang nagadan huli sa Covid. Mayo na nakaheling kan saiyang bangkay ta pig-creamate.
Si Ronil Natera sa edad na 55 makusugon an lawas pero tinamaan nin Covid virus, nagparababa si oxygen sagkod mag-ontok an hinagos asin magadan pakalihis sana nin apat na aldaw sa laog kan BMC. Multi-talented magayon an boses, matibay mag-basketball, matibay magkanta, mag-gitara, mag-piano asin iba pang instrumento sa musika, mabooton, matibay maki-barkada, manager kan ABS CBN MOR FM radio asin voice over talent pero bigla sanang nawara sa tambayan niya sa Quality Bakery & Cafe.
Si Larry Basmayor, dating broadcaster, political operator, Vice-Mayor kan Minalabac, Casureco II president asin director kan cooperatiba sa Minalabac, may aking politiko, may balaeng Congresista, marhay na an buhay alagad biglang nagkahelang nin cancer sa apdo. Oto na sa edad na 62.
An pinaka-famusong si Rufo Tuy Jr na nagbago nin estilo kan pagbareta sa radyo ta may saderi siyang antenna sa harong na nakukua an signal kan mga radyo sa Manila asin abroad, may saderi pang pambihirang lenguahing Bikolnon haling Tinambac. May boses na nagraragaak alagad pig-aantabayan aga-aga bako lang kan mga gurang kundi kan mga juvenes asin mga propesyonal.
Siya mismo an nagsusurat kan saiyang bareta mayo nang iba. Dai siya nagbabasa kan sinurat kan iba. Haloy na siyang nag-ontok sa radyo pero dai malingawan an saiyang pangaran sagkod na siya magadan.
Si Vangie Pontejos, saro sa pinaka-sikat na lady announcer, parasurat nin poems sa English, aktibo sa NGOs lalo na sa grupo kan mga kababaehan kundi nag-ontok siya sa trabaho pag-ataman kan saiyang partner na si Wayne Nieva, sarong technician sa radyo na nagka-igwa nin grabeng kamatean.
Kan bawian nin buhay si Wayne pakatapos na magadan sa atake an saindang aki na si Allan, pakalihis nin sarong aldaw pagbilar sa St. Peter biglang kinapotan nin Covid virus si Vangie asin siya nagadan. Pig-creamate an saiyang bangkay sa BMC asin dai na nungka naheling kan saiyang mga barkada asin mga tagahanga.
An pinaka- mayaman asin poderosong broadcaster sa Bikol na si dating congressman asin dating gobernador na si Louie Villafuerte pagpuli niya sa Manila antes na siya mag-birthday kan sarong taon 2021, nabaretaan na lang digdi sa Naga na siya gadan na.
Man iba-iba an bersyon kan pagkagadan sabi natumba lang, sabi naulakitan kan saiyang boy na may Covid asin duman na sa Metro Manila nagadan. Halat siya kan mga Bikolano na maiuli digdi alagad dai ngani pigdara sa Congreso an saiyang bangkay para sa necrological services asin rinibo an nagharalat digdi na iuuli siya ta dakul man siyang natabangan pero silencio sana an saiyang pamilya.
May regular na programa siya sa radyo antes magpa-Manila asin nadangog an saiyang mga tataramon na habo siya sa bakuna, dai siya tubod. Sabi niya ngani kun may ma-apply nin trabaho na nagpa-bakuna na dai niya aakoon.
Sarong bulan sana pakatapos na magadan si LRV nagsunod an saiyang fiel na amigo na si Jun Sia, Covid man an dahilan. Si Jun Sia negosyante, kontratista, alagad aktibong miyembro kan lokal na media ta apuera kan amigo siya kan mga taga-radyo asin mga taga-peryodiko siya an nagkapital sa mga darakulang proyekto kan KBP asin ATRACS siring kan pagdalaw digdi ni Lea Salonga, an heganteng proyekto kan Miss Bicolandia kan 1990, mga band asin bingo concerts asin an ultimo niyang proyekto an magtao nin awards sa mga outstanding miyembros kan Kantong Putikon asin tambay sa SM Naga.
An naka-biglang marhay sa mga taga-Naga asin taga-media iyo an pakagadan huli sa cancer sa halanohan (throat) kan Golden Voice na si Sammy Gracia Poliyapoy, 74 anyos na duman pa nautsan sa estado kan New Jersy sa America.
Taon-taon siya nagpupuli sa Naga tanganing makahalubilo an mga amigos y amigas pero kan sarong taon kan kuta na maprograma na siya sa sarong FM station sa Naga kan biglang makamate nin kulog nin halanohan asin dai na nakakahalon nin kinakan. Ipinuli siya sa East Coast USA tanganing ipabulong an throat cancer, nagpa-chemo kaya lang kan Abril 22, 2022 nag-ontok an saiyang paghangos. Pig-creamate, iuuli na lang an abo sa maabot na aldaw.
Dati siyang manager kan Radyo kan Bayan, EB FM, DZKI channel 9 sa Iriga asin GMA Barangay FM. Siya an founding president kan ATRACS, naguin KBP chairman nin tolong beses, basketball player, mabooton asin amigo kan gabos.
Grabe talaga an pangyayari na dara kan pandemya bako lang huli sa virus kundi pati sa problema sa pagbuhay, nawaran nin trabaho asin nagkaralaom sa mga harong na dai nakakaruluwas sa laog nin duwang taon.
Tibaad lamang dai na ini maotro liwat.