Mga kontribusyon kan ECs sa PHILRECA dapat pundohon na

Matapos kan desisyon kan Office of the President na nagsisipa sa puesto ki NEA Administrator Edgardo Masongsong, sarong grupo nin miembros-consumedores an naghuhurot sa Board of Administrators kan National Electrification Administration sa pamamayo ni DOE Secretary Afonso Cusi na ipapundo na sa mga electric cooperatives (ECs) an ano man na konstribusyon sa arin man na party-list o organisasyon pulitikal.

Ini an mga pahayag ni Pete Ilagan, Presidente kan National Association of Electricity Consumers for Reforms (NASECORE) Inc. kan maconduciran nin entrevista kan Bicol Mail sa paagi nin telepono sa tahaw kan movimiento ngunian kan ibang consumers group sa Luzon, Visayas asin Mindanao sa reclamo sa isyu na tinugotan kan hinaling NEA Administrator an mga resolusyon kan ECs na magtaong campaign contributions kan eleksyon nasyonal kan 2019 sa Philippine Rural Electric Cooperatives Association (PHILRECA) bilang party-list asin ini langtadan na pangangampanya asin nagbabalga sa ley susog sa desisyon kan Presidential Anti-Corruption Commission kan Agosto 20, 2021.

An ECs nagtaong kontribusyon puon sa cantidad na P500,000 hasta P1.5-milyon sa panahon kan 2019 national election na candidato an PHILRECA bilang party-list.

Saro pa sa pigbuyagyag ni Ilagan na ilegal an pigkukulektang P1.00 kan Philreca sa cada miembros-consumedores na binabayad kan ECs bilang annual dues.

Igwang total na 121 ECs sa Luzon, Visayas asin Mindanao na igwang kagabsan na 14 milyon na miembros-consumedores asin kun on peso cada household, P14 milyon an tinataong annual dues sa Philreca, sabi pa.

‘‘Misappropriation an ginigibong ini kan manijamiento asin junta kan ECs huli ta dapat igwang pagtugot an consumedores sa paagi kan Annual General Membership Assembly’’, sabi pa ni Ilagan.

Nag-ehemplo pa na kun an sarong cooperativa nin electricidad igwa 200,000 mil na miembros-consumedores, ini nagbabayad nin P200 mil na annual dues.

An isyung ini sainda nang hinuhurot sa NEA Board of Administrators na pundohon na an ano man na kontribusyon sa annual dues sa Philreca na saro nang party-list.

Si General Manager Ana Sylvia Alsisto kan Camarines Sur I Electric Cooperative asin Board President Roy Cordova kan Central Negros Electric Cooperative iyo an mga complainant sa caso na naprubaran kan PACC na nagkasala an NEA Administrator sa casong grave misconduct asin dagos nang binabawal na magpugol nin ano man na posisyon sa gobierno.

Si Alsisto nagpahayag na puon magrehistro an Philreca bilang party-list dai na sinda nagbabayad nin annual dues.

Dinagdag pa kan presidente kan NASECORE na nagsangat na sinda nin caso kriminal sa Ombudsman laban sa dating NEA administrator kasunod kan desisyon kan Malacañan. (DPA)