Mga kriminal pinalibre, hurot isunod na an political prisoners
Sa atubang kan ginatos nang mga kriminal sa nasyon na pinapalibre kan gobierno, alagad dakul pang mga activista, kritiko kan gobierno sa ngunian an progesibong grupo naghuhurot na palibrehon naman an mga political prisoners.
Ini an saro sa mga mayor na isyu asin kurahaw kan mga human rights advocate asin iba pang progresibong grupo sa ika-74 anibersaryo kan Human Rights Declaration Day kan Deciembre 10, 2022 sa saindang mga ginibong magkasuruhay na mga protest rally sa manlaen-laen na ciudad sa Bicol maging sa iba pang lugar.
Digdi sa Bicol apat na mga political prisoners an saindang hinahagad sa gobierno na palibrehon na asin ini iyo sinda Ramon Rescovilla, inarestar kan Septiembre 7, 2020 na padagos pang detinido sa Camarines Norte Provincial Jail; Digna Aquilino na arestar kan Deciembre 4, 2020 asin detinido ngunian sa Tinangis Penal Farm sa Pili, Camarines Sur; Marites Pielago inarestar kan Hulyo 28, 2022 sa Ciudad nin Naga na detinido sa Tinangis Penal Farm, Pili, Camarines Sur; asin Elwin Mangampo na inarestar kan Mayo 30, 2021 asin detinido sa Ligao, City Jail.
Si Rescovilla, sinahotan kan militar sagcod na kinasohan nin murder asin illegal possession of firearm and explosives; si Aquilino nag-aatubang nin casong illegal possession of firearms; si Pielago, nag-aatubang nin casong murder asin frustrated murder asin si Mangampo sa casong illegal possession of explosives. An mga acusado anas nagpapahimotik sa caso asin soboot mayong mga basehan.
An grupo nagkaigwa nin mahiwas na protesta na pigparticiparan kan manlaen-laen na sektor na hali pa sa ibang mga distrito asin ginibo sa Plaza Rizal, Ciudad nin Naga.
An mga representante hali sa Kabataan, paraoma, kababaihan, asin human rights workers nagpahayag kan saindang mga sentimiento kontra sa presenting administrasyon.
Saindang sinabi na sa enot na anom na bulan ni Presidente Ferdinand Marcos Jr. an kamugtakan kan mga Filipino mas lalong malala an nangyayari siring kan mga kondisyones sa civil asin political rights, economia, social, asin kultural.
Protesta kan mga progresibong grupo sa ika-74 Human Rights Declaration Day, Deciembre 10, 2022 sa Plaza Rizal kan Ciudad nin Naga. (BAYAN CSUR)