Mga kurapto sa gobierno ikunkon sa carcel, kurahaw sa protesta

Ikunkon sa carcel an mga kurapto sa gobierno asin dapat ibuelta an mga kinurakot na bilyones de pesos hale sa mga proyekto sa infrastraktura. Ini an kurahaw kan mga nagparticipar sa 2nd Trillion March sa Ciudad nin Naga kan Noviembre 29.

An ika-duwang protesta sa ciudad pinangenotan kan Arkidioseses nin Caceres, iba pang mga religious groups, Bikol Laban sa Korapsyon (BLK), estudiantes hale sa manlaen-laen na colegio asin Universidad asin iba pang sektores gikan sa mga banwaan sa Camarines Sur asin Ciudad nin Naga.

An isyu sa kurapsyon bako sanang sa nasyonal maging digdi sa Bicol dai mahahalian mientras na dai pa nakaka-abot sa Kabikolan an ginigibong imbestigasyon kan bagong sekretaryo kan Department of Public Works and Highways (DPWH). Nagtutubod an ibang sektores na an labi-labi sa pagkabig nin kickback iyo an mga politico mayormente sa ghost project bako lang sa flood control.

Nagtutubod an mga nagpoprotesta an opisyales na habo nang magharale sa posisyon saro sa mayor na envuelto sa isyu para sa saindang interes.

An prayer rally malinaw na pagpaconciencia sa mga parahabon sa gobierno na dapat nang ikunkon sa carcel asin ibalik an mga hinabonang na cuarta.

Huli kaini, dapat nang maging envuelto digdi an gabos na namamanuan.

Sa lado kan Naga City Police Office, nagsabi na naging matuninong an protesta mantang nagdugang sindang personajes nganing maseguro an paz y orden asin pagmantenir kan bulos trafico.

NAGIN matoninong an Trillion Peso March na liwat pigpangenotan kan simbahan sa ciudad nin Naga kan Noviembre 29, aldaw nin Sabado na pigatendiran nin labi sana sa 3,000 na partisipantes – mas hababa kumpara sa parehong actividad na enot nang ginibo kan Octubre 1 (CARITAS CACERES-NAGA photo)