Mga motorista binawalan mag-agi sa spillway sa barangay Luluasan, huli sa tubig baha

Balatan, Camarines Sur --- Liwat naman naparalisar an viaje sa rutang Barangay Luluasan sa banwaan na ini kan Lunes, Huly 14, 2025 matapos kan mahiwas na pagturopas kan daga asin tubig sa tinampo asin apektado an spillway sa banwaan na ini huli kan mga pag-uran.

An opisina kan MDRRMO tolos nagpaluwas nin aviso sa publico asin motorista na dai ngona mag-agi sa spillway kan Barangay Luluasan huli kan tubig baha.

An ahencia nagbugtak man nin traffic sign nganing dai makauyo an motorista sagcod na dai pa naghuhuros an tubig baha.

Alagad an Department of Public Works and Highways (DPWH) kan 5th Engineering District sa Camarines Sur nagtabang na sa clearing operation nganing mapakaskas asin mahale an mga daga sa tinampo asin maagihan na nin mga vehiculos kun maghupa na an baha.

Tinampo asin spillway sa Balatan, Camarines Sur dai maagihan huli kan pagtopas nin daga asin tubig baha. (MDRRMO LGU Balatan)