Mga nagpapa-bakuna vs Covid-19, matumal

Apesar kan kampanya kan Department of Health asin mga lokal na gobierno sa pagpa-bakuna laban sa coronavirus disease alagad sa ngunian matumal pa an mga ginigibong vaccination sa manlaen-laen na provincia kan Bicol mala ngani haros mantinido pa an bilang sa 3.9 milyon an mga vaccinated individuals.

Ini base man sana sa pinaluwas na datus kan opisina rehiyonal kan DOH Bicol sa pamamayo ni regional director Ernie Vera.

Maging man sa Ciudad nin Naga na yaon pa ginigibo sa mall an vaccination site alagad sa report kan vaccinator coordinator nag-aabot pa sana sa 25 por ciento an nagpapa-tudok nin booster shot.

Segun sa DOH kun babasehan an nasa 3,941,720 an numero kan mga Bicolanong nabakunahan, mas halangkaw nin dos mil hali sa 3,939,358 na record kan nakaaging duwang semana, sabi pa kan DOH.

Mientras tanto, padagos nang nasa low risk sa Covid- 19 an healthcare utilization rate sa rehiyon Bicol.

Nasa 11 por ciento nalang an utilization rate kan mga Covid beds sa mantang 9 por ciento man sa intensive care unit matapos ukuparon anom sa mga ini sa 65 pigtagamang mga ICU rooms.