MGA PARAATAMAN NIN ORIG NAA-ALARMA: ASF virus liwat naman naglalakop sa Bicol

Naa-alarma naman an mga may mga origan sa tahaw kan pagbuwat kan African swine fever (ASF) virus sa tolong provincia sa Rehiyon Bicol na kinababalehan kan Camarines Sur, Camarines Norte, asin Catanduanes.

Magigirumduman kan mga nakaaging taon nagpoon sana sa Bombon, CamSur an caso alagad dai nakontrol sagcod na naglakop sa iba pang provincia.

Alagad an Department of Agriculture nagpatanid na si may mga hayopan na nagdududa may helang an saindang ataman na orig isombong tolos sainda nganing makuanan nin blood sample para ma-examin kan DA Bicol Regional Animal Disease Diagnostic Laboratory nganing makumfirmar kun positivo sa virus.

Si Lovella Guarin, regional spokesperson kan DA Bicol nagsabi na an mga lugar na may caso kan ASF sa Camariness Sur sa Barangay La Purisima, Santiago asin La Trinidad, sa Ciudad nin Naga sa Barangay Carolina, sa Nabua sa Barangay Lourdes Old, sa Barangay Amomokpok, Ragay asin sarong Barangay sa Pamplona asin Pili. Sa Catanduanes sa Barangay Pandan asin Virac asin Barangay Paracale, Camarines Norte.

Si mga nagpositivo sa ASF virus tolos man pig-depopulate nganing dai mag-ulakit mantang nagpapadagos an pag-monitor sa iba pang mga barangay. Sinabi pa na estrictong iimplementar an biosecurity measures, pagpalinid sa atamanan hayop madis-impektar an mga tangkal.

Hinagad na sa mga LGUs na magpasunod nin border control asin dai basta magpalaog nin mga orig na hale sa ibang lugar.

An DA, LGUs, asin National Meat Inspection Service igua nang mga coordinasyon nganing maibitaran an paglakop kan virus sa hayop.

PADAGOS na pig-eenkaminar kan mga nanunungdan an mga hog raisers sa Kabikolan na gibuhon an mga medyos sa saindang mga tangkalan kontra pag-ulakit kan ASF (PNA FILE PHOTO)