Mga paraoma nakatarok panin paroy dawa may El Niño

Dawa nagpaluwas nin kumfirmasyon an Philippine Atmospheric and Geophysical Astronomical Services Administration (PAGASA) na nakabandera an El Niño ngunian na 2024, labi sa 66,000 hektarya nin kaomahan sa Bicol naghabol sa tubig nganing patarokan alagad an Department of Agriculture nagtutubod na dai man enterong maaapektuhan an rehiyon.

An nangyari baliktad an klima, kan Septiembre 2023 dapat nagsikad na an mainit na panahon na tinamaan kaini an ibang mga rehiyon alagad digdi sa Bicol mauran si panahon sagcod kan Deciembre 2023 asin sundo sa Febrero 2024 matubig pa an kaomahan na daing gayo apektado an satong rehiyon, sabi ni Lovella Guarin an opisyal na parataram kan DA Bicol.

Sagcod kan Noviembre 15 kan nagtalikod na taon sa datus kan ahencia igwa nang total na 66,109 hektarya an natarokan nin paroy mantang igwa pang bagong 4,887 hektarya na naghabol kan katubigan sa mga oma alagad nagtutubod an DA dai na ini apektado kan panahon nin tig-alang o El Niño.

Piglalaoman na makakabawi an mga paraoma huli kan ‘‘shearline’’ o sobrang mga pag-uran kan huring cuarto kan 2023 sa report kan ahencia maabot sa P41.2-M si danyos sa paroyan sa mga provincia kan Albay, Sorsogon alagad sa Masbate sana inabot nin P27.28-M.

Bako gabos na mga municipalidad sa rehiyon an apektado alagad ini base sa Climate Risk Vulnerability Assessment (CRVA 2019) an mga puedeng tamaan kan El Niño iyo an Oas, Ligao, Pio Duran, Libon, Guinobatan, asin Rapu-Rapu kan provincia nin Albay; Labo, Sta. Elena, Capalonga, Jose Panganiban, Paracale asin Basud kan Camarines Norte; Ragay, Libmanan, Tinambac, Lagonoy, asin Caramoan kan Camarines Sur; Caramoan, Viga, Gigmoto, Virac, San Andres, asin Pandan kan Catanduanes; Milagros, Aroroy, Mandaon, San Pascual, asin Baleno kan Masbate; Matnog, Irosin, Bulan, Sorsogon City, Juban, Magallanes asin Prieto Diaz.