MGA PARATUKDO DAPAT BAKUNADO: Expanded F2F classes nakaandam sa Naga

Nagtutubod an Department of Education (DepEd) sa Ciudad nin Naga na may kataposan man giraray an pandemya nganing idagos na ninda an pighahace na Expanded Face-to-Face (F2F) classes na nagpalyar huli kan pagralangkaw kan caso kan Covid-19 sa ciudad ngunian na Enero.

Inaprubaran sana ni Alcalde Nelson Legacion iyo an segundarya na kaipuhan bakunado an mga paratukdo maging an mga estudiantes.

Alagad posibleng magkaigwa nin controvercia sa mga paratukdo mantang enot nang pigreklamo sa Commission on Human Rights an memorandum kan DepEd na mandatory vaccination.

Isinibog an memorandum kan DepEd Naga huli kan pinaluwas na kasugoan kan CHR na dapat dai maging mandatory an vaccinations.

An mga school administrator gabos nang pabor sa pagbuelta sa classroom kan estudiantes sagcod sinda nagsurat sa City Hall asin an tinugutan sana kan jefe ejecutivo para sa secondarya.

Ini an mga pahayag ni Dr. Manny De Guzman, City School Division Superintendent kan DepEd sa ciudad na sainda nang pigpunan an mga ginigibong preparasyon kan Deciembre 2021 para sa expanded F2F classes na haros sarong kinsenas zero na sa Covid-19, alagad kan maglaog an bulan nin Enero 2022 makaskas na naglangkaw an virus.

Si gabos na mga preparasyon saindang iginilid dinamay na an pagsuspendi kan limited pilot face-to-face classes sa Panicuason Elementary School.

An gabos na mga health standard na pigmamanado kan DOH iyo an pig-andam kan mga principal nganing ano man na aldaw ipadagos an expanded F2F classes, preparado an DepEd Naga, sabi pa ni Dr. Guzman.

An Naga na nasa alert level 3 estricto sa mga dai pa bakunado na bawal maglaog sa mga establisimiento de negosyo, City Hall maging sa mga mall.

Sa report kan Health Emergency Response Task Force maabot na sa 90 por ciento kan residentes kan ciudad bakunado na asin ini lampas na sa 70 por cientong herd immunity kan national IATF.

Sa DepEd Bicol, sinabi ni regional director Gilbert Sadsad na mahalat man giraray sinda kan pinakahuring direktiva hale sa saindang opisina sentral kun nuarin puponan an expanded face-to-face classes.

Huli kan halangkaw na caso kan Covid-19 sa Bicol saindang sinuspende si F2F classes sa onseng mga escuelahan kabale an sarong pribadong escuelahan sa Daraga, Albay. (dpa)