Mga pinakamayaman sa nasyon asin kinaban

Kontra ako sa pagpublikar kan ngaran nin tao asin mga pamilya na abang yayaman.

Sabagay kun ililista an pangaran kan mga pobre kadakulon na marhay dae kayang basahon sa radyo o e-imprinta sa diyaryo. Seguro an tuyo kan pag-anunciar na iyo na sinda magserbe bilang inspirasyon sa mga nakatingag na pobreng namamanwaan.

Sabi digdi sa Pilipinas an pamilya Villar ( ex-Senador Manuel Villar, Senadora Cynthia Villar asin saindang mga aki ), daog na an mga Ayala, Razon, Sy, Gocongwei, etcetera.

Nagpoon nagyaman si Villar pakagadan ni Henry Sy asin barangay-bangaon kan mga aki ni Sy an saindang kayamanan asin kan madaog siya para president kadtong depuntong Benigno Noynoy Aquino III. Milagro ta kun sisay pa si daog sa eleksyon iyo an nakagulpi.

An sabi nasa hiwas kan saindang propietades arog kan mga subdivision asin malls sa Metro Manila asin mayor na ciudades kan nasyon kabali na an Naga asin Bikol.

Sa Naga duwa an subdivision ni Villar, an Camilla Homes, igwa na sa Pili asin an sabi mabukas pa sa Dalipay, Milaor. Igwa sindang mall---an Vista Mall na mamahalon an presyo kan mga barakalon kaya didikit an tao maski mahiwas an saindang activity area, mayong fastfood chain arog kan Jollibee asin Mcdo, may kontrol pa sinda sa mga kompaniya nin tubig sa man iba-ibang parte kan Pilipinas.

An sabi nasa likod sinda kan magarbong negosyong real state na kadakul man napapayaman sa mga ahente ninda sa provincia.

Pero sa totoo lang an bentahe sa siring na sistema iyo an pagdugang kan labor force o mga trahabador na natatawan nin regular na hanapbuhay. An problema ta an uma asin mga daga na tanoman nin paroy, mais, gulay asin iba pang pagkakan iyo lugod an nababawasan mala baga ta haralangkaw na an presyo kan pagkakan sa mga merkado asin saod sa mga ciudad asin banwaan apesar na an Pilipinas pig-aapod na agricultural country.

Kadto pa namasdan ko na an paraumang nagtatrabaho sa maghapon malaboy an bitis, rugado an hawak pero iyo lugod an tios mantang si “Among” na paratungod nasa laog kan aircon na opisina, naka kyutiks iyo an nakakadelhensyang marhay sa pag-uma bako an parauma.

Haros kaya an mga negosyante iyo an nagkakapital kan mga paragastos kan mga para-uma.

Kan dekada 60 asin 70, an agrikultura iyo daa an harigui kan ekonomiya kan nasyon.

May UP College of Agriculture sa Los Baήos Laguna, may CCSAC digdi sa CamSur, may Bicol Colleges of Agriculture sa Albay, nagbugtak pa nin Rice Research Institute o IRRI na may dakulang kapital haling Amerika pero an nangyari lugod buminagsak an agrikultuta, nagmahal an presyo kan bagas, nag-iimportar na kaini hali sa luwas asin naguin dakulang political isyu an pag-uma asin pagnegosyo nin bagas.

Ngonyan daog na kita kan Thailand, Vietnam, Pakistan asin India na nagpa-ereskwela kan saindang mga aki sa UP Los Baήos.

Pig-oorolayan sa media pero mayo man nangyayari pag-nagpalpak an programa ayuda hali sa badyet nasyonal, naagui sa mga politiko asin dae aram kun nakaka-abot sa mga biktimang mga parauma alagad an sierto Y seguro may guiguiromdumon na ayuda hali ki Congressmen, hali ki Mayor, hali ki Gobernador, hali sa Senado, hali sa Congreso o hali sa Malacaήang na guiguiromdumon pag-abot kan eleksyon o sarong porma nin vote buying na bawal kuta na sa ley pero an may kag- guibo iyo an mga para-panday kan mismong ley.

Disganado na an kadaklan kan mga Pilipino, milyones kan pinaka-pobreng 30 porsyento kan populasyon dae nagtutubod na may paglaom pa an satong nasyon maski siisay an maguin presidente. Ta garo naka-programa man sana an satong pagtios asin pagkamang kan satuyang ekonomiya.

Garo kaya igwang may nasa likod kan satong pagtios.

Kaya kun iisipon anong labot ta kan mga mayayaman ta kita pobre sana asin tios.