Mga political prisoners sa Bicol naglalangkaw, sabi

Naglalangkaw an numero kan mga political prisoners sa Bicol alagad igwa man nakakaluwas sa saindang ‘‘detention’’ matapos paboran kan jusgado an petisyon na makabayad nin piyansa.

Naninindugan an progresibong grupo sa Bicol na kun igwang tinugotan an administrasyon ni Presidente Ferdinand Marcos na paluwason na sa carcel an ibang mga political prisoners na dagos nang pinalibre sa caso. Alagad digdi sa Bicol igwa nang mga nakaluwas sa carcel gabos nagbabayad nin piyansa mantang pendiente pa an mga caso.

Sa ngunian an nakaluwas na sa carcel huli sa piyansa iyo sinda Nelsy Rodriguez kan Bagong Alyansang Bayan sa Camarines Sur; Jen Nagrampa kan Gabriela; Pastor Dan San Andres kan Karapatan Bicol; Marites Pielago kan BAYAN; asin Sarah Sta Rosa kan Anakpawis. An saindang caso igwang murder, frustrated murder, illegal possession of explosives, illegal position of firearms asin iba pang caso, alagad an mga acusado nagpahayag na gibo-gibo sana an mga evidencia kontra sa sainda.

Si Vince Casilihan kan BAYAN Camarines Sur nagpahayag sa Bicol Mail na sa ngunian igwang 39 mga political prisoners sa Kabikolan. An militar asin PNP iyo an envuelto sa pagsangat kan mga caso criminal.

Sa ginibong ika-74 anibersaryo kan International Human Rights Declaration Day an mga human rights advocate sa Kabikolan an saindang kurahaw sa protest rally na palibrehon na an mga political prisoners.

Saindang tinawan ponto mas marhay pa si mga kriminal iyo an pigtawan prioridad kan gobierno na palibrehon sa caso alagad si mga political prisoners digdi sa Bicol asin sa iba pang rehiyon etsapuera sana.

Sa mga pahayag ni Ariel Casilao, National President kan Anakpawis saiyang sinabi na an nangyayari sa bilog na nasyon sarong political persecution kan mga kritiko, aktibista, maging sa mga ordinararyong namamanuan na nagpapahayag kan saindang opinyon. Konkreto ini sa mga redtagging asin harassment, kasunod kan mga pigsasangat na mga gibo-gibo caso, ilegal na pag-aresto asin extrajudicial killing. ‘‘Ito ay authoritarian at state terror tactics, kung saan kahit may Bill of Rights, tinatakot naman ang mga malawak na mamamayan para manahimik at hindi na kumontra sa gubyerno’’, dagdag pa ni Casilao.