Mga politico na mabayad sa PTC, PW cacasohan-9th ID

Dawa saro na sanang guerilla front an grupo kan New People’s Army (NPA) sa Bicol alagad an 9th Infantry Division kan Philippine Army sa rehiyon magiging higot sa pag-monitor sa mga politico na mabayad nin ‘'permit to campaign, permit win’’ mantang nagrarani na an eleksyon sa Mayo 2025.

Alagad nagpatanid an militar sa arin man na politico na maatubang nin caso sa pagbalga kan Anti-Terrorism Act of 2020 o RA 11479 na mataong bayad para sa PTC asin PW.

Ini an mga pahayag kan 9th ID kan Philippine sa Bicol sa pamamayo ni MGen Noe Alberto Peñafiel sa saindang pag-atubang sa miembros kan media sa tahaw kan nagpapadagos nindang operasyon sa natatadang sadit na grupo kan rebelde.

Cada tiempo eleksyon an CPP/NPA nag-iimponer nin PTC-PW sa mga candidato alagad magabat an caso kriminal na aatubangon kan arin man na politico makooperar sa rebelde.

Sinabi pa mientras na sarong guerilla front na sana an CPP/NPA sa rehiyon asin mayo nang namamayo kan saindang Central Committee matapos bawian nin buhay si Jose Maria Sison kan 2022 dai na sindang ideolohiyang sunosunod envez pangingikil na sana.

Sinabi pa kan 9th ID na determinado an saindang tropa nganing sumoko an mga natatadang rebeldeng NPA mientras na andam akoon an mabalik loob.

Sa ngunian igua nang 2,174 an mga nadakop, 60 mga nagadan sa mga operasyon, 100 mga naarestar, asin 1,500 nagsuroko na sa gobierno, sabi pa.