Mga poste kan Casureco II sa road right of way gagaboton

Pupunan na ngunian na bulan nin Enero 2022 kan Camarines Sur II Electric Cooperative (Casureco II), an naabalang relokasyon kan mga electrical post na ulang sa road right of way sa kalabaan kan Panganiban Drive, Ciudad nin Naga na sasabayan nin mga brownout.

Panahon pa ni dating Project Supervisor/Acting General Manager Nelson Lalas an kasundoan kan Casureco II asin Camarines Sur 3rd Engineering District kan Department of Public Works and Highways (DPWH) an planong paggarabot kan mga poste na yaon sa laog kan road right of way, inabot na nin ma-tolong taon marerealisar man giraray.

Si Rinner Bucay, opisyal na parataram kan Casureco II nagpahayag na iimplementar na ano man na aldaw ngunian na Enero 2022 an relokasyon kan mga electrical post alagad saro sa nakaabala an lugar kan babalyohan kan poste.

Dai palang nahahaloy nagabot na si mga konkretong poste sa dating Liboton Avenue na ngunian Melchor T. Villanueva Avenue sa pagtarabangan kan cooperativa asin DPWH asin nagagamit na kan mga vehiculo an pinahiwas na tinampo.

Pigbuyagyag pa ni Bucay na naging problema pa ninda sa pag-relocate nin mga poste iyo an batutilan na paghale kan mga telcos asin cable TV kan saindang mga cable.

Kan nakaaging taon enot nang pig-implementar an relokasyon sa mga electrical post sa national road kan Magsaysay Avenue, Barangay San Felipe, Pacol asin pasakat sa Barangay Carolina.

Inabot nin tolong taon antes natapos kan kontratista an road widening project sa M.T. Villanueva Avenue huli kan mga ulang na estractura bako lang poste envez puon nin kahoy asin kudal kan pribadong residencia.

Pigrereclamo kan mga motorista an dai pa nagagabang kudal kan Ravanera residence na apesar mahiwas na an tinampo asin dakul nang nagharali kan saindang ulang na estractura alagad an sinambit na kudal habo pa giraray ipahali. (dpa)