Mga pulis dai makiaram sa Oplan Baklas

An Philippine National Police (PNP) sa Camarines Sur nagpatanid sa mga kapupulisan na dai na makiaram sa trabajo kan Oplan Baklas kan Commission on Election envez pabayaan sana mantang an saindang trabajo magtaong seguridad asin magmantenir kan paz y orden.

Habo nang mangyari kan PNP Camarines Sur sa pamamayo ni Col. Bernard Perez na naging envuelto an mga naka-uniform na mga pulis asin personaje kan Bureau of Fire Protection na mismo na sinda an naglaog sa sarong pribadong propriedad sa Ciudad nin Santiago sa provincia nin Isabela asin iyo pa an nagbaklas kan mga tarpaulin nin mga candidato.

Nakuanan nin video an sinambit na insidente na tinaranggal si mga tarpaulin ni VP Leni Robredo, presidential candidate sa maabot na eleksyon sa Mayo 9, 2022 apesar na yaon na sa pribadong propriedad.

Si Lt. Col. James Ronatay, opisyal na parataram kan PPO Camarines Sur nagpahayag na nag-aapelar sinda sa kabaro ninda na kun kaibanan sa Operation Baklas kan Comelec pabayaan sana kun mayo man nangyayaring kariribokan mantang an saindang trabajo magtaong seguridad asin segurohon na mayong insidente asin magmantenir kan paz y orden.

An Comelec nagpahayag na igwa nang desisyon sa Comelec vs Bacolod Bishop na binaba kan Corte Suprema kan 2015 na binabawal an commission sa paagi kan saindang Oplan Baklas sa pagharali kan mga campaign materials nin mga candidato na pinagibo kan pribadong indibiduwal asin yaon sa pribadong propriedad.

Digdi sa Camarines Sur nagkaigwa nin sarabay na Oplan Baklas an mga municipal office kan Comelec, na escorted sinda kan PNP, kaibanan an mga taga Department of Public Works and Highways, Department of Environment and Natural Resources asin Bureau of Fire Protection.

An DPWH iyo man an nagbabaklas kan campaign materials si mga yaon sa propriedad kan gobierno kabale na digdi an tulay mantang an DENR sainda man hinahale an mga pinakong poster sa mga kahoy.

Si Atty. Niel Caninula, Provincial Election Supervisor kan Comelec sa Camarines Sur nagpahayag na mayo man nin reclamo sa saindang grupo arog kan nangyari sa Santiago City.

Saindang prioridad na hinarale si mga over size na campaign materials asin si mayo sa designadong common poster area asin si mga candidato nasyonal iyo an saindang pig-enot mantang an campaign period nagsikad kan Febrero 8, 2022.

Sa Naga City Police Office (NCPO), si Pol. Col. Nelson Pacalso, City director nagpatanid man sa mga miembros kan NCPO na kun kabale sinda sa grupo kan Oplan Baklas dai magbaklas propaganda materials nin arin man na candidato dawa naheling ninda na mayo sa designadong lugar.

Atendiran sana an saindang obligasyon magtaong seguridad sa personajes kan Comelec o sa grupo kan Oplan Baklas nganing mayo sindang problema asin ano pa man na caso na puedeng atubangon. (dpa)