Mga residente kan Dumagmang nagdudurolag sa saindang brgy

Labo, Camarines Norte --- Maabot na sa 52 na kaharongan sa barangay Dumagmang sa banwaan na ini napiritan na tuwadan kan mga tios na residentes huli kan suboot harassment kan mga awtoridad asin haros barabanggui sunod-sunod an saindang nadadangog na putok nin badil hale sa kampo kan PNP.


An insidenteng ini matapos an nangyaring ‘‘Dumagmang Encounter’’ kan Marso 19 na nagadan an limang pulis asin duwang iredo.


Alagad an apektadong nagdudurolag na residentes hagad sa lokal na gobierno na magtahaw sa dialogue sa pag-ultanan kan mga residente sa presencia kan opisyales de barangay.


Sa report kan barangay council kan Dumagmang sa pamamayo ni Kapitan Arnulfo Jalimao, ipinahayag na puon kan Marso 27, 2021 nagpuon nang nagpatos-patos an mga residente na nag-eestar sa Purok 6.


Afuera pa kaini, nakadagdag sa saindang katakotan sa lugar iyo an ginibo kan mga pulis ki BPSO Myra Diolata asin saiyang aki na si Rjay Diolata na pig-iinbestigaran kan mga pulis an biglang sinapok asin tinimakan an tulak nin duwang beses asin sinabihan kan pulis na ‘‘gigilitan iyo sa leeg.’’


Sinabi pa sa report ni PB Jalimao asin pirmado kan mga miembros an barangay kagawad, nagbisita sinda sa Purok 6 nganing aramon asin maheling an kamugtakan kan mga residentes alagad pig-abandona na an mga harong.


Nagkakatarakot na an mga residentes kan barangay sa nangyayari sa saindang lugar asin naghahapot sinda kun ligtas pa an saindang buhay asin saen sinda mahagad nin tabang.


‘‘Ang Sangguniang barangay at lahat ng mga mamamayan ng barangay ay lumapit na sa opisina ng Punong Barangay, Tanggapan ng Sangguniang Bayan at Tanggapan ng DILG upang matulungan ang Brgy, Dumagmang at lahat ng naninirahan dito na maibalik ang dating mapayapa, tahimik at ligtas na pamumuhay ng mga mamamayan at mabuhay ng walang takot at pangamba para sa aming mga pamilya’’, sabi pa sa report kan barangay council petsado Marso 30.


Hagad ninda sa DILG asin lokal na gobierno na matabangan sinda sa lalong madaling panahon.


Mga harong kan pobreng paraoma sa Purok-6 Brgy. Dumagmang, Labo, Camarines Norte mayo nang nag-eerestar matapos magdurolag an mga residente huli kan natatakot sa barabanggui nalang nakakadangog nin putok nin badil sa kampo kan PNP.