Mga road crash incident sa Bicol nagbaba sa 30%

Ciudad nin Legazpi --- Nag-abot sa 7,851 an mga road crash incident sa Kabikolan hasta Septiembre 2023 o siyam na bulan kan kaparejong taon alagad nagbaba nin abot sa treinte por ciento (30%) kumpara kan 2022 na igwang 8,817 base sa datus kan opisina rehiyonal kan Land Transportation Office (LTO).

Sa entrevista kan Bicol Mail ki Regional Director Francisco Ranches Jr., sinabi kaini huli kan saindang mga ginigibong kampanya sa paglikay asin pag-implementar kan leyes sa trafico nag-bababa na an mga insidente sa road crash maging binabawian buhay.

Kabali sa mga programa kan ahencia iyo an practical driving course, examination antes makakua nin lisensiya sa pagmanijo, estrictong policia antes ma-isyuhan nin driver’s license, regular na pagluwas sa tinampo kan saindang law enforcers maging sa road inspection padagos an pagbaba kan mga aksidente, sabi pa ni Ranches.

Na-obserbaran pa kan LTO kun yaon an saindang presencia nababawasan an mga aksidente.

Sa datus kan 2022 nag-abot sa 278 an mga binawian buhay sa mga insidente sa road crash kumpara sa 219 sagcod kan Septiembre 2023.

Nagpapadagos an mga ginigibong prayoridad sa road safety sa mga viajeros sa paagi kan LTO Bicol enforcers na haros aroaldaw an operasyon nganing maimplementar an traffic laws asin RA 4136 sa kanya-kanyang areas of responsibility.

Sa Ciudad nin Naga igwa man sadiring version an Naga City Police Office (NCPO) sa pamamayo ni City Director Col. Erwin Rebellion sa paagi kan inaapod na One-Time Big-Time katuwang an mga enforcers kan LTO, Highway Patrol Group asin Public Safety Office.

An mga ley nasyonal asin ordinansa sa trafico iyo an pig-iimplementar kan NCPO na misyon sa road safety nakakasikop pa kan envuelto sa ilegal na droga asin iba pang ilegal na actividad sa tinampo.

LTO Director Francisco Ranches Jr. (sa tahaw) tiniripon kan Febrero 27, 2024 sa first quarter meeting an sub-committee on transports management na inatendiran kan saindang mga respectibong ahencias. Kabali sa pig-urulayan an pagcrear nin Anti-Colorum Task Force.