Mga substandard product nirapak kan DTI sa City Hall

Abot sa cantidad P410,00 na mga substandard product na kinumfiscar kan Department of Trade and Industry (DTI) Camarines Sur sa mga establisimiento de negosyo sa Ciudad nin Naga, Pili, Ciudad nin Iriga asin iba pang mga banwaan an nirapak nin pison sa natad kan City Hall kan ciudad kan Lunes, Oktubre 16.

Si Jay Percival Ablan, Director kan DTI Camarines Sur nagpahayag an saindang aksyon na rapakon an mga dipalitong produkto saindang kinumfiscar poon kan Noviembre, Deciembre 2022 asin ngunian na taon sa saindang mga magkasurohay na operasyon alagad magpapadagos orog na ngunian na Christmas season na mapalusot kan fekeng produkto.

Sa Ciudad nin Naga magkatuwang sinda kan Consumers and Protection Committee kan Sangguniang Panlungsod sa pamamayo ni Consejal Jess Albeus.

Nirunot nin pison an mga produkto na kinababalihan nin Christmas lights, may dayang kilohan, construction materials, sanitary wares, mayong ICC stickers asin fekeng produkto.

Sinabi pa ni Ablan sa saindang operasyon kaibahan an mga awtoridad sa coordinasyon sa LGUs.

Sa ginibong pagrapak kan mga produkto na pinangenotan kan DTI sa pamamayo ni Ablan, presente sinda Alcalde Nelson Legacion, Bise Alcalde Nene De Asis, mga miembros kan Sangguniang Panlungsod asin iba pang opisyal.

Taon-taon igwang mga nirarapak na mga dipalitong produkto an DTI asin piglalaoman ngunian na panahon nin Pasko liwat naman sinda malibot sa ciudades kan Naga, Iriga asin mga banwaan nganing kumfiscaron an mga substandard product.