Mga taga mediang kandidato ngonyan
Happy days are here again. Maogma garo pista ta mawararak an mga platika lalo na an kuarta.
Kadaklan kan mga taga media siribot magpapapirma nin mga kontrata para sa political ads/ greetings kan mga politiko asin kandidato. Darakula an komisyon ta an iba 50-50.
Pero may mga nagkadarakop o napiritan kan ibang Partido o politiko na magfile kan saindang COCs para magdalagan sa manlaen-laen na pwesto sa lado lokal.
May mga re-eleksyonista, may mga bagito man. An iba balik bayan.
Si Salvio Fortuno Jr. nagdadalagan para bise gobernador kan Camarines Sur, na aki ni Cong. Sal Sr. asin Congw. ni Jocelyn Fortuno na konsideradong purong taga media ta an magurang anas taga media. Si Cong. Sr pa an godfather kan lokal na media, Santa Claus pa.
Si Vice-Gobernor Imelda Papin kandidata para gobernadora konsiderado man na Santa Claus kan media ta dating naglilibrar nin payola sa mga taga radyo patugtugon an saiyang musika.
Si Cong. Gabby Bordado dating announcer sa DZDR asin DWLV, parasurat sa dyaryo nasyonal asin lokal, nagdadalagan man para re-eleksyon.
Si dating Mayor Antonio Chavez kan San Jose, dating announcerbsa DZGE, malaban ngonyan para congressman kontra ki incumbent Arnie Fuentebella.
Si Sir Noel De Luna dating radyo reporter sa Naga kandidato para congressman sa tercer distrito laban ki Bordado.
Si Arnel Eclarinal saro man taga radyo nominee para congressman kan Partylist na Kusog Bikolandia.
Si Grace Refama Simando, station manager kan Radyo ng Bayan, kandidato para bokala kan tercer distrito kan Camarines Sur.
Sa Naga re-eleksyonista sindang mga mediamen Lito Del Rosario asin Jose Perez para konsehales.
Si Noel Agravante kan Lupi tolong turno nang konsehal malaban na para bise-alkalde, si konsehal Paul Manaog kan Pili malaban nang board member kan 3rd district.
Si Edwin Lara dating konsehal kan Garchitorena ma konsehal guiraray.
Si Rene Orellosa mabalik bilang konsehal kan Siruma, si Ervin Borja para konsehal kan Tinambac, Adonis Aguilar konsehal kan Calabanga, Audie Concina kan San Jose, Cris Bersabe kan Minalabac, Gil Villareal kan Goa, Elaine Parma-Orong asin Jovan Galvo sa Magarao.
Igwa pa garo na dai nakaabot sako an listahan.
An kadaklan kan taga media talagang pig-iimbitaran ta biristado sinda asin popular. Kadaklan pati nagarana.
An problema lang ta kun nagana asin naguiguin popular inoorihan kan sainda man sanang pag-iriba asin kan mismong mga among dahil sa takot na sinda matahuban.
Saro pang problema kan mga taga media ta kun migarana dai na nang guirirong-guirong ta oromok-omok o kun takot na magtaram kontra sa nanunungdan ta baka halian sinda nin paragastos.
An popularidad kan taga media bakong garantiya nin kapangganahan o marhay na servicio publico lalo na kun siya mismo mayo nin sadering kapital.