Mga tourist spot sa Naga preparado na sa turista

Piglalaoman kan Arts, Culture and Tourism Office (ACTO) kan Ciudad nin Naga na maruso ngunian na semana an ribo-ribong lokal asin dayuhan na turista huli kan harahalawig na aldaw nin bakasyon.

Preparado na an mga tourist spots sa itaas na barangay kan ciudad mantang nagbugtak na nin mga directional signs, may mga personajes kan ACTO na maantabay bilang tour guide, kabali na an mga hotels, terminal, mga lomang simbahan maging an Basilica Minore sa barangay Balatas na binibista nin mga devotos.

Nagkaigwa na nin coordinating meeting an ACTO asin City Disaster Risk Reduction Management Office sa pamamayo ni Ernesto Elcamel, Naga City Police Office asin Public Safety Office para sa seguridad kan mga turista.

Ini an mga pahayag sa Bicol Mail ni City Administrator Elmer Baldemoro asin nagtutukaw na pamayo kan ACTO mientras na saindang piglalaoman na mas dakul ngunian an maabot na lokal asin dayuhan na turista na kabali sa maheheling iyo an bisita iglesia.

Kabali sa pigbabalikan kan turista iyo an Hot Spring sa Barangay Panicuason, Malabsay Falls sa Mt. Isarog asin iba pang mga tourist spot sa ciudad.

Inabot nin duwang taon apektado an turismo sa ciudad huli kan pandemya alagad piglalaoman na mahibog ngunian na semana bako lang sa panahon kan semana santa envez sa iba pang mga aldaw.

Sinabi pa ni Baldemoro na bukas an Tourist Center sa Plaza Rizal na igwang personajes kan ACTO nganing mag-antabay kun igwang mga kahapotan an turista.

Makakatabang sa lado nin economia an programa sa turismo maging sa mga saradit na namamanuan na nagkakaigwa nin trabajo.

Sa lado kan preparasyon sa paz y orden, an Naga City Police Office sa pamamayo ni Col. Nelson Pacalso nagpahayag na bako lang sa mga simbahan nakawarak an kapupulisan envez sa iba pang mga pigdadayong lugar maging sa hotels sundo sa upper barangay kan ciudad.

Igwa nang nakalatag na mga Police Assistant Center yaon pa an Oplan Sumvac mantang nagdestino pa nin mga tourist police.

Sa Bicol Central Station, inaabot na nin nin otso mil an mga pasajeros an nagbababa sa ciudad hali sa Metro Manila asin iba pang mga provincia.

Sinabi ni Terminal Manager Roderick Reforsado preparado an saindang mga awtoridad nganing maseguro an paz y orden.

Sa Provincial PNP Office kan Camarines Sur nagdeclara nin ‘‘full alert’’ poon pa kan Marso 27, 2023 asin magpapadagos ini sagcod sa panahon kan bakasyon.

An DPWH, LTO asin iba pang ahensya kan gobyerno nagwarak man kan saindang mga personajes sa national highway nganing magtabang kun igwang emerhencia. (DPAureus)