Mga ‘’Undecided, No’ sa bakuna babalikan kan opisyales de brgy.

Babalikan kan mga opisyales de barangay kan Ciudad nin Naga an saindang residentes na nagbotong ‘‘undecided asin No’’ sa survey nganing enganyaron na magpatudok giraray nin bakuna contra sa coronavirus disease (Covid-19).

Si Liga ng mga Barangay President asin ex-officio member sa Sangguniang Panlungsod Antonio Beltran nagsabi na ini an saindang pinagkasundoan sa ginibong urulay kan Liga mantang nasa cincuenta (50) por ciento sana sa resulta kan survey nagpapabor magpatudok bakuna laban sa virus.

An Barangay Health Workers (BHWs) sa viente siete barangay kan ciudad iyo an natukahan na maglibot sa mga residentes nganing magkunducir nin survey alagad sa pinakahuring datus sa report kan BHWs nag-aabot sana sa cincuenta por ciento an andam na magpatudok.

Si enot na survey sa cada harong sa mga barangay nag-abot sana sa 30 por ciento alagad huli kan paglangkaw kan caso sa virus sagcod na sarong bulan nang yaon sa lindong an ciudad sa modified enhanced community quarantine (MECQ) naglangkaw an nagpapabor magpa-bakuna, sabi pa ni Beltran.

Alagad an Liga dai pa kuntento kan 50 por ciento nagkasurondo na magtabang na an opisyales de barangay nganing makumbensir an mga residente na magpabakuna.

Dinagdag pa ni Beltran na kaibanan na ninda iyo an mga Sangguniang Kabataan sa 27 barangay kan ciudad sa paagi kan pagbukas sa barangay hall nin facilidad nganing dai na magpalista sa online registration sa vaccination program kan City Hall para ma-enganyar an mga jovenes maging iba pang sektor na digdi na magrehistro kun mayo sindang sadiring internet connectivity.

Pig-aandaman kan City Hall an pag-abot ngunian na bulan kan suplay kan DistriPhil, awtorisadong distributor kan COVAXIN nganing iyo an ibakuna sa residentes kan ciudad.

Sinabi pa ni Beltran na 50 mil na doses na order na alagad igwa pang-pigpareserba an ciudad nin dugang na 100 mil na doses kan COVAXIN.

An efficacy kan vaccines na gibo sa Bharat India pigpahayag na maabot sa 89 por ciento na dai man nagrarayo sa Astra-Zeneca.

Si enot na pig-order na Astra-Zeneca dai nang asegurasyon sa tahaw kan global demand sagcod na nagdesisyon an Sangguniang Panlungsod asin Alcalde Nelson Legacion na maghanap nin ibang supplier. (dpa)