Midya sa buhay ni Louie (LRV sa buhay kan mga taga-midya)



“Put science into it.”


Dapat may kamanungdanan o marhay na kaabtan. Dapat pirming areglado an mga bagay-bagay. May direksyon. Iyan an pirming pigsasabi samuya sa mga broadcasters sa DWLV AM (Love Radio ---) ki Butch Robredo an primerong station manager, sako bilang program/production manager, ki Ric Diaz, ki Gil Basmayor, depuntong Manny Dela Rosa, Lady Love Winnie Ceas, depuntong Cris Rances, Ildy Amador, Max Fajardo, Bitoy Ojeda, Monico Imperial Sr., depuntong Andoy Pakoykoy , pati mga technicians sa pangenegnot kadto ni Chief Entong Madrigal na kan pagpoon mi pag-operar kan 10k Radio an pinaka-makusog na estasyon nin radyo sa Bikol kan 1981.


Idto an pig-aapod na Love Radio, Super 10K sa birikan kan AM radio.


Mala kan pagbukas mi kasabay kan si eleksyon ni Presidente Ferdinand Marcos laban ki Heneral Alejo Santos. Mayo pang edificio an estasyon ta an samuyang mikropono yaon sa natad kan presenteng residencia ni LRV, kun bangui an mga layog-layog nagraralog sa samuyang nguso pero an tao sa atubangan, sa gilid asin sa likod kan samuyang natutukawan na announcers booth pahingurag nin taong nagdadalan aldaw bangui.


Kampi kami ki Marcos kaidto siyempre daog si Santos. Luhay-luhay nagka-igwa nin sadering edificio an BBS-DWLV kataid kan harong ni Ministro Villafuerte.


Kaskason an mga pangyayari, si Villafuerte bilang mayor na patron nin musika asin kultura naglansar kan primerong Bicol Music Festival. Duman nanggarana an mga famusong sonata arog kan “Bikolano Ako”, “Boses ni Lolo” asin “Ika Sana an Namomotan”.


Ginibo sa UNC Sports Palace kan taon 1982 an tolong nasambit na sonata gabos naisaplaka asin naguin sikat bako lang sa Bikol kundi sa Metro Manila pati na sa ibang lugar. Nagbutwa por primera vez an magagayon na sonatang Bikolnon bako lang sa harana asin karantahan sa pista kundi pigpapatugtog na sa mga radio stations. Namotan asin ipinag-orgolyo an magayon na musikang Bikolnon.


Otro taon nagka-igwa kan 2nd Music Festival alagad nadagdagan kan Bikol Heritage Foundation Awards tampok si Nora Aunor, Dindo Fernando, Manuel Conde ( national artist), Victor Wood, Mary Walter, Eddie Garcia asin iba pa.


Orog na pinagtangkilik kan mga Bikolano an siring na proyekto ni Luis Robredo Villafuerte.


Kaya an pagpuli niya sa Bikol poon kan huring parte kan dekada 70 bilang trade minister, Interim Batasan Pambansa member, siya na an nagbukas sa puso asin isip sa musika, kultura asin estoryang Bikolnon.


Naglansar pa siya nin mga libro dapit sa naka-aguing panahon asin estorya kan ronang Bikolnon lalo na an provincia nin Camarines Sur poon kan 1575 asin iba pang mahahalagang pangyayari sa Kabikolan na sinurat ninda Jose Fernando Obias asin Prof. Danny Gerona.


Nabuksan naman ni Villafuerte an isip kan mga Bikolano dapit sa estorya kan saindang lugar na Kabikolan. Pati an mga obra sa linya ni arte asin pagpinta, tinawan niya nin dalan an mga matitibay na pintor arog ki Raul Arcomendas, Pancio Piano, Jonamar Salvosa asin mga matitibay na iskultor.


Pati an Capitolyo sa Pili kan siya an gobernador bako lang pinahiwas kundi pinagayon na pigdadalaw nin dakul na turista, mga estudyante, mga professional asin ordinaryong namamanwaan hali sa ibang lugar arog kan Albay, Sorsogon, Camarines Norte asin Metro Manila.


Ginibo niya yan sa paagui nin dikit sanang pondo antes mag-abot an famusong CWC sa capitolyo asin Gota beach sa Caramoan. Pinatugdok niya an Governor’s Mansion, Farm House, Eco Village asin an heganting Convention Center sa kahiwasan kan provincial capitol ground sa Cadlan Pili, Maycatmon asin San Antonio Milaor.


Duman naheling an saiyang pagui-guin visionaryo asin builder sa amay na parte kan saiyang carera politica.


Iyan gabos nabantog dahil sa saiyang paggamit kan facilidades kan media.


Bako lang radyo kundi siya pa an enot na nagbukas kan ABS-CBN Channel 2 na nagbalangibog kan mga pangyayari sa Gulf War kan dekada 90. Igwa pa siyang Vanguard magazine na kan enot pig-edit ni Atty. Oning Bonnevie, ama ni Dina. Sumunod an magazine na Leader Vanguard na bako lang nagpabantog kan Caramoan Peninsula kundi pati kan mga bagong edificio sa capitolyo asin mga darakulang personalidad sa provincia lalo na an mga historical figures asin outstanding citizens. An editor si Doming Alarkon.


Sa linya nin politika hararom an suksok ni LRV. Nakakua siya nin kadakul na boto sa IBP eleksyon kan 1978 bako sana sa Camarines Sur kundi sa lima pang provincias kan Bikol pati Legazpi City. Siya an nagbilog kan UNIDO Party na nagsararo kan Apat na Aguila (Villafuerte, Cea, Alfelor asin Andaya) na nagpasukamang kan KBL o Apat na Uwak sa eleksyon kan Batasang Pambansa kan 1984.


Tatao si Villafuerte sa efectivo asin pulidong paggamit nin media maguin radyo, telebisyon asin dyaryo kaya madali siyang nabantog asin pinaghangaan kan mga darakulang political leaders asin opisyales kan gobyerno sa luwas kan Camarines Sur.


Siyempre igwa man mga kalaban asin ka-iriwal sa politika lalo na kan nagkakandidato siyang gobernador asin congressman pero yaon an respeto asin pagsaludadar sa saiyang abilidad sa pagmani-obra sa mga pangyayari asin nin mga tao lalo na kan siya yaon pa sa lindong kan partido ni Marcos asin kan yaon siya sa lindong ni Cory Aquino.


Dai aram kan kadaklan antes siya magpuli sa Bikol kan 1978 nagsusurat na siya nin regular na column sa dyaryo nasyonal na Philippine Daily Express.


Bako lang siyang politiko kundi saro pang total media personality na bago siya magtalikod igwa siya nin popular na programa sa radyo aga-aga sa saderi niyang estasyon na BBS-DWLV AM asin FM.


Kaya lang an pinaka-mamundo ta sagkod ngonyan dai naaraman kan publiko lalo na an saiyang mga tagahanga, scholar asin mga constituentes kun tano ta dai pigpuli an saiyang bangkay tanganing ilubong sa Bikol, an rona na saiyang namundagan asin an tunay na dahilan kan saiyang pagkagadan.


(An iba pang mga media personalities na nag-agui ki LRV iyo sinda Aling Sonia, Joel Buena, Ernie Abragan, Wally Vargas, Pati Baby, Bebot Calleja, Armi Azor Pena, Ato Pena, Emman Prado, Lito Lopez, Elaine Parma Orong, Jimmy Letada, Malou Mercado, David Dollano, Noel de Luna, Chussie Depositario, Pat Aguilar, Christine Beron, Gabby Bordado, Rolly Bosquillos, Johnny Morning, Jun Alarkon, Ernie Marfil, Raul Sodsod, Rolly Gonzales asin kadakul-dakol pang iba).