Migz, nag-eestar na sa Ciudad nin Iriga

Hale sa Pili, Camarines Sur nagbalyo nang estaran sa Ciudad nin Iriga si Gobernador Migz Villafuerte mantang saiyang pig-aandaman an pagdalagan bilang candidatong diputado kan Rinconada district.


Nag-aarkila nin residencia sa Camia Street, barangay San Nicolas kan ciudad, ‘‘I really feel like home as of May 2020 I buy lot sa barangay San Agustin, Ciudad nin Iriga’’.


Ini an kumfirmasyon ni Villafuerte sa atubangan kan mga alcalde asin lideres ninda sa politica sa ginibong actividad sa pag-anunciar kan Sabado, Deciembre 19 ni dating diputado Salvio Fortuno na sainda nang pinapahunod ni Congresswoman Jo ‘Sal’ Fortuno sa joven na gobernador an pagcandidatong congresista sa maabot na pirilian sa Mayo 2022.


Na-unambitan kan gobernador kan nakaaging eleksyon lokal napatos niya an pinakahalangkaw na voto sa mga candidato sa Rinconada district na nag-abot sa 31,901 nganing ganahon niya an re-election contra ki dating diputado Rolando Andaya Jr.


Nagpasalamat siya sa mag-agom na Fortuno asin sinabi kaini na ‘‘I respect Sal and Jo’’ huli ta marhay an saindang pinaheling na serbisyo sa namamanuan kan Rinconada district asin toltol na mga kaulay asin ipapadagos niya an mga proyecto.


Pig-anunciar ni dating diputado Fortuno an mga candidatong vocal kan saindang distrito na kinababalehan ninda incumbent board member Rex ‘‘Buchokoy’’ Oliva, Mrs. Silvia Noble esposa kan paluwason na vocal Manny Noble asin saiyang unikong aking lalaki Sal Fortuno Jr.


Sa sinambit na tiripon kan mga lideres ninda Fortuno asin Villafuerte sa Iriga Plaza Convention, mayo si Bise Gobernador Imelda Papin.


Dai naman na-unambit kan gobernador kun tano ta dai kabale sa tiripon an saiyang bise gobernador. (dpa)