Milaor Consultative Council
Huli ta nagkaralaom sa harong an mga retirado, pensionado asin ex-politiko sa Milaor naisip ninda na magmukna nin sarong consultative council asin consultative assembly na ma urolay-olay asin mahimaymay kan mga isyus na pig-aatubang kan saindang banwaan kan Cam Sur asin kan nasyon.
Ngonyan poco mas o menos 10 na an pigtitingkog tanganing magtao nin opinion dapit sa mga pangyayari bako lang sa politika pati sa negosyo asin dapit sa isyu nin inumon na tubig asin boundary disputes na an orihinal na sadit na grupo compuesto kadtong nag-organisar kan engrandeng 100 anyos na anibersaryo kan Milaor Central kan 2002 asin Grand Alumni Homecoming na pig-partisiparan nin rinibong gradwado kan eskwelahan na nagpuruli pa haling abroad asin Metro Manila.
“Apolitical” daa ini o mayong halong politika.
Pano an mga alkalde kan banwaan asin iba pang mga opisyales dai lamang naghahadoy sa mga gurangan ta garo sinda sana an tatao ta sinda man lang daa an may mandato kan tao na magdesisyon.
Dai daa sinda madolok sa mga kandidato sa mga politiko sa proyektong ini. Pero kun magdolok okey lang ta sasabihon ninda an katotohanan.
Ngonyan pano an pigtutubod sana kan mga lokal na politiko an mga taga-kapitolyo asin representantes sa Congreso. Dai lamang pighahapot an saindang namamanwaan kun ano an saindang masasabi. Halimbawa kun tano ta an duwang barangay kan Milaor an nasakop kan Camarines Sur LGU…. An mga barangay kan Maycatmon (kabanga kan CWC asin kabanga kan Lago del Rey), asin Eco Village Park asin barangay San Antonio na kinamumugtakan kan Governor’s Mansion asin LRV Village.
Makulog an boot kan mga taga-Milaor mantang kasadit-sadit kan banwaan 20 sanang barangay dukot sa Pili asin Naga pati sa Archdioces of Caceres pero an Milaor sakop na kan 2nd District na centro an Libmanan, Dioces of Libmanan asin kadakul pang nawawarang lugar na nasasakupan arog kan barangay Palestina kan Pili, barangay Samplaoc kan Gainza, Mabolo kan Naga asin Baraka kan San Fernando pati San Juan- San Lorenzo kan Minalabac.
Nagpopoon nang magmeriting-meting an grupo pero sadit sana muna. Nagtitiripon sa mga harong-harong kan original members. Pwedeng ipaapod an mas dakulang asembleya pakatapos na siguro kan eleksyon.
Konsultahon o dai magpapadagos an saindang funccion bilang centro nin debate kan mga lokal na isyu kan mga banwaan. Dai man sinda mahagad nin pondo sa gobyerno municipal pero an saindang paninindugan ipupublikar sa publiko por medyo kan media, social media asin print media.
Pigmiminar ini na magbago an daralagan kan buhay sa Milaor na sadit na banwaan pero garo sakop kan ciudad, garo sakop kan capital town, ipit kan Pili asin Naga asin luhay-luhay nang mauubos an mga uma ta pigbabakal kan mga Ka-IIntsikan sa Naga.
An mga nangengenot na barangay kan Milaor na pwedeng mag-asenso tolos garo ciudad iyo an Dalipay, Capucnasan, San Vicente, San Jose asin Tarusanan.
Kadto an mga harong digdi saradit-sadit sana pero ngonyn kadakul-dakol na, konkreto na asin magagayon na an hitsura.
Nasa Milaor an pinaka-dakulang bulangan, pinaka-dakulang bodega asin may night club pa.
An mga darakulang truck ni Tato Mendoza nakaparada gabos sa Milaor. An Rural Bank of Milaor tigbak na pero tindog pa an Rural Bank of Camalig.
Asin madali nang magtindog an multi-milyon na edificio na bubugtakan daa nin dakulang mall sa atubangan kan presenteng municipyo, sa gilid pa kan kalabaan kan Milaor-Minalabac road.
Dai kamo matubod na an propietades kan Simbahan Catoliko asin gobyerno municipal mayo nin boundary ta durukutan sanang marhay mala ta an sabi kadtong depuntong Mayor Rogelio Flores mayong separation of church and state (nakahalo lang an mga pagsurusadiri kadtong depuntong Ms. Rufina T. Subastil asin kadtong depuntong Don Roque Tena.
Dai kamo matubod na an yaman kan kompaniyang NFH asin an impluwensiya kaini dakula pa sa municipyo asin abot duman sa Ragay Gulf asin West Philippine Sea!