Milaor masaker kinundenar kan Karapatan Bikol
Kinundenar kan progresibong Karapatan Bikol an nangyaring Tarusanan masaker sa Milaor, Camarines Sur na limang magpirinsan na De Leon an binawian nin buhay dinamay pa an tolong mga inosenting menor de edad.
Nakikidamay an Karapatan Bikol sa pangapudan na matawan justicia an mga biktima maging iba pang injusticia sa nasyon.
‘‘Bilang isang nagkakaisang bayan, wasto lamang na ipahayag nating ang kolektibong galit dahil walang napapanagot. Mag-ambag at makisangkot tayo para tulungan ang mga biktima at hanapin ang hustisya para sa ating lahat.’’. sabi pa sa press statement.
An Municipal Police Station kan Milaor, CamSur padagos pa an saindang manhunt operation maging an iba pang mga MPS sa Camarines Sur asin Bikol nganing maarestar an suspechadong si Arturo De Leon.
Si Arturo, tugang ni Pfc Mark Emmanuel De Leon kan 9th Infantry Division kan Philippine Army na iyo man an suspechado sa pambabadil gadan ki Marlon De Leon kan Deciembre 26, 2020 aki ni Romeo De Leon y Perez, 72 anyos na kabale man sa limang mga biktima sa masaker.
Pigbuyagyag pa kan Karapatan Bikol sa saindang listahan ika-15 na an insidente sa Tarusanan masaker sa Bikol na gabos an mga suspechado miembro kan AFP, asin sa ibang insidente kabale an PNP, alagad iba an pinakahuring caso sa masaker huli ta personal ang motivo kan suspechado. Sa na enot na 14 insidente pig-aakusaran an elemento kan AFP, segun pa sa progresibong grupo.
An Tarusanan masaker nangyari kan Noviembre 5 hapon na an mga biktima kinababalehan ninda, Romeo De Leon y Perez, 72, Samuel Cobilla Jr. y De Leon, 21 anyos, Noela Agliones y De Leon, 7 anyos, Hobbie John Britanico y De Leon, 6 anyos asin Robbie John Britanico y De Leon, 4 anyos.
Gamit an M-16 riffle daing herak na pinagbabadil an mga biktima asin nagpasabog pa nin granada antes nagdulag matapos kan krimen.
MGA ARMAS NABAWI SA HARONG NI ARTURO DE LEON
Mientras tanto, anom na aldaw matapos kan makangirat na krimen an pinagsarong fuersa kan Milaor MPS, Swat team, mga mobile force asin PPO Camarines Sur pigsakyada an residencia ni Mrs. Marcelina De Leon, ina ni Arturo asin digdi nag-eestar alagad dai na inabutan an suspechado.
Armado nin search warrant na pig-isyu ni Juez Pablo Formaran kan RTC sa Ciudad nin Naga an mga elementos kan PNP asin saindang nabawi an duwang kalibre 45 asin mga bala kaini asin sarong granada.
An pighahanap na suspechado dai naman naabotan kan mga awtoridad na segun sa ina bulan pa nin Deciembre 2020 dai na nag-pupuli sa saindang residencia.
Sinabi pa an residencia ni De Leon palibot nin CCTV camera. (dpa)