Milaor Politics

Saditon na banwaan na may 20ng barangay pero apat sagkod limang maoorag na taga-Milaor an maralaban-laban para alkalde sa eleksyon sa 2022.

Dati one-on-one lang an ralaban sa banwaan na in ikan mga naka-agui apuera kun may pan-tolong binabalahan kan sarong kampo na makwarta para daogon sa boto an pighuhunang mas makusog na kandidato.

An banwaan na Milaor poon maglaog an naka-aguing siglo may hilom na dinastiya na pugol kan mga Nationalista.

Pambihira lang an maka-lusot na Demokrata o Liberal magpoon kan pag-abot kan mga Amerikano sagkod sa mga panahon na ini.

Kan magsuway si Alkalde Anthony “Lhabas” Reyes sa kampo kan mga Villafuerte tanganing magdakit sa kampo kan mga Andaya, napiritan si Congressman LRay Villafuerte na an Bise ni Lhabas na si Senen Bermas iyo an manukon ninda laban sa incumbent.

Si dating Kapitan Abel Flores, aki kadtong depuntong Alkalde Rogelio Flores na mayo man lang planong mag-lansar nin kandidatura sa eleksyon na maabot ta nagadan si saiyang ama sa Canada kan Disyembre kan sarong taon asin dinaog pa ni Lhabas pagka-mayor kan 20 19, inulayan ni Ex-Congressman Nonoy Andaya na mag-bise ki Lhabas.

Pero habo kan incumbent na maguin running mate an juven na Flores huli ta kalaban niya ini kan naka-aguing eleksyon.

An huring-huding sa kampo ni Andaya si Abel papakandidatuhon man giraray ni Andaya para alkalde laban ki Lhabas.

Si Abel pati igwa na nin Bise sa persona kan 3-termer na Kagawad Gerry Santa Ana.

Mantang si Lhabas igwa na nin Bise sa persona ni Leodel Menes, si Senen Bermas lugod na iyo na an manok kan mga Villafuerte mayo pa nin Bise asin nagkakalap pa lang nin mga Kagawad.

Pero an sabi ni Vice-Mayor Bermas mayoriya kan mga kapitanes saiya maiba maski an mga incumbent kagawad sa sanggunian na siya an presiding officer garo dai niya kapot ta an lealtad ninda yaon pa ki Mayor Lhabas.

Ini man si Bong Avancena na juven asin miyembro kan Mormon Church na may sadiri nin mahiwas na tanoman nin kalunggay sa banwaan nin Pili dicidido man maglaban para allalde. Siya sarong scholar kadtong panahon sa National Arts Center ta very bright na aki, naka-trabaho na siya sa abroad asin nag-uli digdi dai pa lang nahahaloy ta marhay na an kamugtakan kan buhay.

Pobre man lang an pamilya ninda kundi palibhasa matatali may mga tugang na siyang mga propesyonal arog kan arkitekto, may enhinyero, asin mga paratukdo, marhay naman an buhay kan pamilya, magagayon na pati an mga harong.

An agom ni Avancena sobrena man lang ni Vice-Mayor Bermas na nag-aalok ki Bongna mag-Bise na lang o mag-konsehal sa saiyang linyada alagad sabi ni Bong na mayo pang line-up ngonyan kun madadaog siya sa eleksyon norong-taon na Bise-Alkalde o konsehal mas marhay pang madaog bilang Mayor.

Igwang sarong babae na nag-asenso an buhay sa Manila an nagpuli tanganing magdeklara kan saiyang kandidatura para-Alkaldesa, juven pa, may sarong aki pero biyuda na na nawalatan nin bastanteng yaman asin pagsasaderi kan saiyang nagtalikod na agom.

Segun ki Editha Capardo Lopez na taga-barangay Del Rosario, pinaka-dakulang barangay sa banwaan ngonyan alagad naka-istar na sa San Roque kun sain siya nagpatugduk nin harong. An saiya daang tuyo sa pagkandidato iyo an maserbihan an banwaan niyang namundagan. Saka gusto niyang magka-igwa nin babae na hepe-ehecutivo. Igwa na lugod siyang Bise sa persona ni dating Kagawad Jun “Mangsad” Dialino.

An orolay-olay sa Milaor ngonyan ta sige na an rilibot kan mga aspirante sa manlaen-laen na barangay garo bako nang gayong kwarta an mapagana sa mga kandidato.

Sabagay pareho makwarta an duwang kampo Villafuerte asin Andaya.

Pero sabi kan mga tao mga importanteng isyu an tutukaron sa karampanyahan na zoom o virtual naka face mask, naka face shield asin may social distancing. Sin dutdot, sin kawkaw.

An mga isyu sa Milaor enot an alkalde daa dai man naka-istar sa Milaor kundi sa Canaman. Ikaduwa an tubig na inumon na puro lang pangako, mayo man. An mga boundary disputes sa San Fernando, Minalabac, Pili orog na sa Capitolyo na an Governor’s Mansion nakatugduk sa barangay San Antonio, an Eco-village na nakatugduk sa barangay Maycatmon, an motor pool na sakop kan barangay Maycatmon siring man an kabanga kan CWC asin Lago del Rey.

Sabi kan mga kalaban ni Lhabas pigpapara-omaw niya an soboot accomplishments o mga naginibohan ni Governor Migs pero mayo man.

Mas dakul daa an babaeng habitantantes, juven o gurang sa banwaan nin Milaor kun kaya pwedeng babae an paganahon ta magboborotungan pababa an apat na lalaki.

An sabi kan iba an magabat na magkalaban si Bermas asin Lhabas ta pareho incumbent asin kapot nin mga makakwartang politiko.

Sa ibong na lado mas makusog daa si Abel Flores ta may makinarya pa na nawalat idtong saiyang ama asin sekreto pang pigsusuportahan ni Andaya.

Si Kagawad Jhoan Hidalgo na esposa kaidtong depuntong Mayor Andre Hildalgo dukot pa ki Lhabas kaya pwedeng an makinarya kan mga Hidalgo itao man ki Lhabas.

Kaya lalong ribong an balanak kan banwaan na Milaor ngonyan ta an saindang distrito an centro nasa Libmanan na harayuon na marhay, pati an Diocese na nasa Libmanan man.

Pero an ibang kadagaan na nasasakop kan Capitolyo ta iyo an nakadukot na marhay sa Milaor pati na an mismong ciudad nin Naga kun sain an kadaklan na taga-Milaor nagtatrabaho, nagsisirimba, nag-eereskwela asin nagdadara nin mga gulayon.

An magiguin resultado kan masunod na eleksyon iyo an mataong tunay na “identity” sa banwaan na namundag pa poon 1585 saro sa pinaka-dakula kan panahon alagad kasadit-sadit na lang ngonyan.